तृणमूलमे विभाजन : नव गुट ऋतब्रत बनर्जीकेँ विपक्षक नेता नियुक्त कयलक

कोलकाता। समदिया

हालहिमे संपन्न पश्चिम बंगाल विधानसभा चुनावमे हारक एक मास बाद तृणमूल कांग्रेसक भीतर फूटक खबरि आब आधिकारिक रूपसँ सामने आबि गेल अछि। विधानसभामे तृणमूल कांग्रेसक कुल 80 विधायकमे सँ 58 विधायकक नेतृत्व निष्कासित विधायक ऋतब्रत बनर्जी आ संदीपान साहा कय रहल छथि। बुधदिन विधानसभामे एकटा नव प्रस्ताव राखल गेल, जाहि पर एहि 58 विधायकक हस्ताक्षर छल। प्रस्तावमे एही बात पर जोर देल गेल अछि कि ई सभ तृणमूल कांग्रेस केर सच्चा प्रतिनिधिक छथि। एही प्रस्तावमे ऋतब्रत बनर्जी हावड़ा जिला केर उलुबेरिया (पूर्व) विधानसभा क्षेत्रक प्रतिनिधित्व करय वला तृणमूल कांग्रेस विधायककेँ विपक्ष केर नेता (एलओपी) नामित कयल गेल अछि।

एही प्रस्तावमे तृणमूल कांग्रेस केर कतेको विधायककेँ विपक्षक उपनेताक रूपमे सेहो नामित कएल गेल अछि। एहिमे उत्तरी कोलकाताक एंटाली विधानसभा सीटसँ संदीपान साहा, पश्चिम मेदिनीपुर जिलाक केशपुरसँ शिउली साहा आ दक्षिण 24 परगना जिलाक कस्बासँ जावेद अहमद खान शामिल छथि। रघुनाथगंजसँ तृणमूल कांग्रेस केर दिग्गज विधायक अखरुज़्ज़मानकेँ एही प्रस्तावमे विधानसभाक भीतर नवक तृणमूल कांग्रेस गुट केर मुख्य सचेतकक रूपमे नामित कयल गेल अछि। मुदा एही प्रस्तावमे पश्चिम बंगाल केर पूर्व मुख्यमंत्री ममता बनर्जीकेँ खाली पार्टी केर ‘सुप्रीमो’ यानी पार्टीक अध्यक्षक रूपमे पेश कयल गेल अछि।

प्रस्ताव पर जिनक हस्ताक्षर आयल ओ 58टा विधायक काल्हि भोरेसँ एक-एक कय विधानसभा परिसर पहुंचय लगलाह। एकर बाद विद्रोही विधायकक आपात बैसार आयोजित कयल गेल, जाहि दौरान विधानसभाक भीतर विपक्ष लेल आरक्षित पाँच सीटकेँ पाँच नामक समर्थन कयल गेल। एकर बाद ऋतब्रत बनर्जीक नेतृत्वमे 58टा विधायक सभापतिकेँ सदनमे जा कए प्रस्ताव पेश केलथि। सभापति एहि प्रस्तावकेँ स्वीकार कयलनि।