अपन घर मिथिलाक समस्तीपुर अयलाह वैभव सूर्यवंशी, उत्सवक माहौल

समस्तीपुर । समदिया

मिथिलाक वैभव मंगल, ०२ जूनकेँ अपन घर समस्तीपुर अयलाह। हुनक स्वागत कयल गेल, हुनक आगमनसँ घरमे उत्सवक माहौल बनि गेल। एतेक कम बयसमे आईपीएलक एक सिजनमे एहि मिथिलाक लालक कतेको रिकार्डतोड़ कारनामासँ पूरा क्रिकेट जगत आश्चर्यचकित अछि। से वैभव सूर्यवंशी घर अयलाह तऽ घरमे हर्षोल्लासक संग उत्सवक वातावरण बनि गेल।

बच्चेसँ क्रिकेटक एतेक स्नेही वैभवकेँ पिता वैभवक रुचिकेँ परवान चढ़ाबयमे कोनो कसरि नहिं छोड़लनि। तकरे परिणाम अछि जे खेलक मैदानमे वैभव चौका आ छक्काक बरखा करैत छथि। विश्वक धुरंधर गेंदबाजकेँ ई १५ बरखक मिथिलाक छौंड़ा पानि पिआ देलक आ भयभीत कऽ देलक अछि।

मंगलकेँ पटनाक एकटा होटलमे सेहो लंच भेल, बुधक साँझक फ्लाइटसँ वैभव पटनासँ बेंगलुरु लेल रवाना भेलथि।

आइ वैभव करोड़ो दिल पर राज क’ रहल छथि। राजस्थान रॉयल्सक ई युवा स्टार साबित क’ देलक अछि जे जँ मेहनत सच्चा होए तँ मिथिलाक गामक माटिसँ सेहो इंटरनेशनल सितारा पैदा होइत छैक।

वैभव सूर्यवंशी 15 बरखक उमेरमे जे कएल, ओ ककरो लेल चमत्कारसँ कम नहि अछि। पिच पर उतरिते ओ धुआंधार बैटिंग सँ चौका-छक्का क’ बौछार क’ दैत छथि।

राजस्थान आईपीएल केर फाइनल सँ बाहर जरूर भऽ गेल, मुदा वैभव अपन अद्भुत आ प्रभावशाली प्रदर्शनसँ सभ क्रिकेट प्रेमीक हृदय जितिकऽ इतिहास रचि देलनि।