भाजपा 177 सीट पर धांधली कयलक, कार्यकर्ता पर अनुचित पुलिस कार्यवाही  : ममता बनर्जी

राज्यभरिमे पार्टी कार्यकर्ता आ समर्थक पर लगातार हिंसा आ दंडात्मक कार्यवाही कयल जा रहल अछि

कोलकाता। समदिया

पहिल बेर पश्चिम बंगालमे भाजपा सरकार बनल अछि। तृणमूल कांग्रेस (टीएमसी) केर 15 साल बाद सत्तासँ बेदखल कएल गेल अछि। 15 सालक कार्यकालक बाद तृणमूल कय बेदखल कय भाजपा आत्मविश्वाससँ भरल अछि। एहि शर्मनाक हारक बाद तृणमूल कांग्रेस चुनावी धांधलीक आरोप लगा रहल अछि। दुनू दलक आक्रामक मुद्राक बीच मुख्यमंत्री ममता बनर्जी आइ विरोध प्रदर्शनक घोषणा कयलनि। टीएमसी जतय ई मुखर हमला केलक ओतहि भाजपा सोनारपुरमे भेल मारपीट आ हिंसाक घटनाकेँ ल कय तृणमूलकेँ घेरलक अछि। भाजपा नेता समिक भट्टाचार्य कहलनि जे तृणमूल केर एहन राजनीतिक चालक हुनकर पार्टी पर कोनो असर नहि पड़त।

सीएम ममता अपन धर्ना के दौरान की कहलनि जे भाजपा 294 विधानसभा सीटमे सँ 177 सीटमे वोट गिनतीमे धांधली कयलक। पुलिस धरनाक अनुमति नहिं देलक, तइयो विरोध लोकतांत्रिक तरीकासँ जारी रहत। विरोध आ धरना कायम रहत, चाहे ओकरा दबाबय केर कतबो प्रयास कयल जाय। एहि कठिन समयमे हम टीएमसीक कार्यकर्ताकेँ नहि छोड़ब। कार्यकर्ताकेँ डरा कय विभिन्न स्थान पर हिरासतमे राखल जा रहल अछि। पुलिस टीएमसीक कार्यकर्ताकेँ विरोध प्रदर्शनमे शामिल होबयसँ रोकि रहल अछि। हमर सरकार हमेशासँ मानवीय दृष्टिकोणसँ काज कयलक। बिना पुनर्वास केर सड़क पर बेचय वला केर बेदखल करब कहियो हमर सरकारक नीति नहि छल।

कोलकातामे प्रदर्शनकारीकेँ संबोधित करैत टीएमसीक नेता कल्याण बनर्जी घोषणा कयलनि जे आगामी दिनमे आओर पैघ विरोध प्रदर्शनक आयोजन कयल जायत। ओ कोलकाता पुलिस आयुक्त आ अन्य पुलिस अधिकारी कय मोन पाड़लथि जे हुनक वेतन जनताक टैक्सक पैसाक उपयोग कय देल जाइत अछि आ ताहि लेल हुनका संविधान आ कानूनक अनुसार अपन कर्तव्यक निर्वहन करबाक चाहि। कल्याण बनर्जी कहलनि जे पुलिसकेँ वेतन शांतिनिकेतनसँ पाई आनि सुवेन्दु अधिकारी नहिं दैत छथि। ओ पुलिस अधिकारी सभकेँ मोन पाड़लनि जे समय लगातार बदलैत रहैत अछि। तेँ सभकेँ निष्पक्ष ढंगसँ अपन कर्तव्यक निर्वहन करबाक चाही। टीएमसी नेता केर एही बयानक बाद पश्चिम बंगालमे राजनीतिक बयानबाजी आओर तेज भ गेल अछि।

कल्याण बनर्जी आरोप लगौलनि जे राज्यभरिमे पार्टी कार्यकर्ता आ समर्थक पर लगातार हिंसा आ दंडात्मक कार्यवाही कयल जा रहल अछि। पार्टीक अनुसार, आइ धरि पार्टीक 25 सँ 30 केर बीच पार्टीक कार्यकर्ता केर मृत्यु भ चुकल अछि, जखन कि 5 सँ 8 हजार समर्थककेँ घर छोड़य पड़ल अछि। टीएमसीकेँ आगू दावा अछि जे लगभग 3 हजार घर तोड़ि देल गेल अछि। ओ आगू आरोप लगौलनि जे जखन-जखन आ जतय-जतय पार्टी कोनो आयोजन करबाक योजना बनबैत अछि, तखनहि पुलिस बल केर पहिनेसँ तैनात कएल जाइत अछि जाहिसँ लोक सभामे नहि आबि सकय। पुलिसकर्मी घरक बाहर अपने तैनात कय देल जायत अछि आ जँ महिला वा परिवारक सदस्य बाहर निकलैत अछि तँ ओकरा हिरासतमे ल गिरफ्तार कय लेल जायत अछि।

एहिसँ पहिने टीएमसीक नेता अपन पार्टीक सदस्य पर कएल गेल हमलाक निंदा करैत विरोध प्रदर्शन कयलनि। तृणमूल कांग्रेस आक्रामक रुख अपनौने अछि, कारण भाजपा नेता सुवेन्दु अधिकारी केर मुख्यमंत्री बनलाक बाद-सोनारपुरमे पूर्व सीएम ममता बनर्जी केर भतीजा आ सांसद अभिषेक बनर्जीकेँ अलावा अन्य नेता संग भीड़ केर आक्रोश आ मारपीट भेल अछि।

विरोध प्रदर्शनक दौरान ममता बनर्जी आओर अन्य महत्वपूर्ण मुद्दा सेहो उठौलनि। ओ कहलनि कि तृणमूल नेता केर एही विरोध प्रदर्शनक प्राथमिक उद्देश्य पार्टीक नेतृत्वकेँ लक्षित कय जारी हमलाक खिलाफ सामूहिक आवाज उठायब अछि। विरोध प्रदर्शनसँ पहिने टीएमसीक अध्यक्ष ममता बनर्जी पार्टीक अन्य नेताक संग भारत रत्न बी.आर. अम्बेडकरकेँ श्रद्धांजलि देबय लेल पूर्व सीएम ममता हाथमे संविधानक प्रतिलिपि ल कय पहुंचल छलीह।