118 विधायक लाउ तहन होयत शपथ : तमिलनाडुक राज्यपाल
चेन्नई। समदिया
तमिलनाडुमे सरकार गठन पर सस्पेंस जारी अछि। टीवीके (तमिलगा वेट्री कज़गम) प्रमुख विजय काल्हि एक बेर फेर राजभवनक दौरा कयलनि आ राज्यपाल राजेन्द्र विश्वनाथ अर्लेकरसँ भेंट कयलनि। मुदा राज्यपाल साफ संकेत देलनि अछि जे सिर्फ सबसँ पैघ पार्टी बनलासँ सरकार बनेबाक बाट आसान नहि भ जाएत।
सूत्रक अनुसार राज्यपाल एहि बात पर अडिग छथि जे विजय कय पहिने विधानसभामे स्पष्ट बहुमतक प्रदर्शन करबाक चाही। राजभवनक मानब अछि कि तमिलनाडु जँका पैघ राज्यमे अस्थिर सरकार केर जोखिम नहि उठाओल जा सकैत अछि, एही लेली 234 सदस्यीय विधानसभामे बहुमत लेल जरूरी 118 विधायकक समर्थन साबित करब बहुत जरूरी अछि।
जनतब जे 23 अप्रैलकेँ भेल विधानसभा चुनावमे टीवीके नीक प्रदर्शन कयलक, जाहिमे 108 सीट जीतलक आ सबसँ पैघ पार्टी बनल। ओना विजय स्वयं दूटा सीट जीतने छथि आ नियमक अनुसार एकटा सीट खाली करय पड़तनि। एहिसँ पार्टीक प्रभावी ताकत 107 भ जाएत।
टीवीके केर सरकार गठनक प्रयासमे पैघ राहत तखन भेटल जखन कांग्रेस डीएमके गठबंधनसँ अलग भ विजय केर समर्थन करबाक फैसला कयलक। कांग्रेसक पांच विधायक टीवीके मे शामिल भ गेलाह, मुदा तखनो संख्या मात्र 112 धरि पहुंच गेल, मतलब जे ओ एखनो 118 केर जादुई बहुमतक निशानसँ छह विधायक कम छथि। एहि लेल राज्यपाल एखन धरि शपथ ग्रहण समारोह केर हरी झंडी नहि देललनि।
बुधदिन विजय कांग्रेस केर समर्थन पत्रसँ सरकार बनेबाक दावा कयलनि। दोसर दिन राजभवन पुनः अयलाह। मानल जाइत अछि जे एहि कालखंडमे सरकार गठन आ समर्थन जुटेबाक गणितक संबंधमे चर्चा भेल। मुदा एखन धरि राजभवन द्वारा कोनो आधिकारिक बयान जारी नहि कयल गेल अछि।
सूत्रक कहनाय अछि जे राज्यपाल साफ कय देलनि जे सिर्फ समर्थन पत्र वा मौखिक दावा काफी नहि होएत। हुनका 118 विधायकक ठोस समर्थनक जरूरत अछि जाहिसँ बनल सरकार स्थिर रहत आओर विधानसभामे अपन बहुमत साबित कय सकय।
एहि बीच टीवीके नेता वीएस बाबू मीडियासँ कहलथि जे सरकार गठनक प्रक्रिया जल्द आगू बढ़ि सकैत अछि। मुदा केंद्र सरकार केर कथित दबाव पर ओ कोनो टिप्पणी करयसँ मना कय देलनि।
