आइ पश्चिम बंगालमे दोसर आ अंतिम चरणमे 142 सीट पर मतदान
कोलकाता । समदिया
पश्चिम बंगाल विधानसभा चुनावमे दोसर चरणक मतदानसँ पहिने राज्यमे कानून व्यवस्थाक मुद्दा, कोलकाताक आरजी कर मेडिकल कॉलेज एंड अस्पतालमे डॉक्टरक संग बलात्कार आ हत्या आओर उत्तर 24 परगनाक संदेशखालीमे कथित उत्पीड़न आ दमनक मुद्दा एक बेर फेरसँ चुनावी बहसक केंद्रमे आबि गेल अछि। एहि मुद्दा पर जनता बुधदिन अपन फैसला देत। विपक्षी दल सभ बेर-बेर एही सभ घटनाकेँ उठाबैत रहल अछि, तृणमूल कांग्रेस पर ओकर 15 सालक शासनक दौरान महिलाक खिलाफ हिंसा, धमकी आ अपराधक आरोप लगा रहल अछि। राज्यक 294 विधानसभा सीटमे सँ 152 सीट पर 23 अप्रैलकेँ मतदान भेल, जखन कि शेष 142 सीट पर आइ दोसर चरणमे मतदान होएत।
आइ कोलकाताक सभ 11 विधानसभा सीट पर मतदान होएत जाहिमे काशीपुर-बेलगाछी सीट सेहो शामिल अछि, जतय आरजी कर मेडिकल कॉलेज अछि। संदेशखाली सीट पर सेहो मतदान होएत।
काशीपुर-बेलगाछी सीट बहुत दिनसँ तृणमूल कांग्रेसक गढ़ रहल अछि। 2021क विधानसभा चुनावमे तृणमूल कांग्रेस भाजपा उम्मीदवारकेँ 35 हजारसँ बेसी वोटसँ हरा देने छल।
संदेशखालीमे तृणमूल कांग्रेस 2016मे वामपंथी केर बहुत समयसँ चलि आबि रहल पकड़ि कय समाप्त कय 2021 मे लगभग 39,700 वोटक अंतरसँ एही सीट पर अपन जीत हासिल कयलक।
जनवरी 2024मे संदेशखाली सुर्खी बनल छल जखन राशन घोटालाक जांच करय वला प्रवर्तन निदेशालय (ईडी) टीम पर हमला भेल छल। एहि मामिलामे तृणमूल नेता शेख शाहजहानक नाम सामने आयल। एकर बाद फरवरी 2024 केर अंतमे हुनका गिरफ्तार कय लेल गेल। एकर बाद इलाकाक महिलासँ यौन शोषण आ दुर्व्यवहारक आरोप लागल, जाहिसँ स्थिति आओर बढ़ि गेल।
विपक्ष एहि मामिलामे राज्य सरकार पर आरोपीकेँ सुरक्षा देबाक आरोप लगौलक आ जांच राज्यसँ बाहर हेबाक मांग केलक।
2024 केर लोकसभा चुनावमे तृणमूलक उम्मीदवार बसिरहट सीट पर जीत हासिल कयने छल, मुदा संदेशखाली विधानसभा क्षेत्रमे भाजपाक उम्मीदवारकेँ लगभग 47.64 प्रतिशत वोट भेटल छल, जाहिमे तृणमूलकेँ मात्र करीब 8400 वोटक बढ़त छल।
एम्हर अगस्त 2024मे कोलकाताक आरजी कर मेडिकल कॉलेजमे 32 वर्षीय इंटर्न डॉक्टरक संग बलात्कार आओर हत्याक मामिलामे राष्ट्रकेँ झटका लागल छल। हाईकोर्टक आदेश पर जांच सीबीआईकेँ सौंपल गेल।
पीड़िताक मां आब भाजपाक उम्मीदवारक रूपमे पनिहाती विधानसभा सीट पर चुनाव लड़ि रहल छथि। भाजपा हुनक उम्मीदवारीकेँ न्याय आ महिला सुरक्षाक प्रतीकक रूपमे पेश कय रहल अछि।
ओना हुनक उम्मीदवारी पर मिश्रित प्रतिक्रिया भेटल अछि। कियो एकरा बोल्ड कदम मानैत छथि तँ कियो एकरा न्यायक मुद्दाक राजनीतिकरण कहैत छथि। पनिहाटी, काशीपुर, बेलगाछिया आ संदेशखाली सहित सभ 294 सीटक रिजल्ट 4 मईकेँ घोषित कएल जाएत।
