एनडीए सरकार महिला सभसँ कएलक विश्वासघात : तेजस्वी यादव

पटना । समदिया

आरजेडी नेता तेजस्वी यादव मुख्यमंत्री महिला रोजगार योजनाक मुद्दा पर एनडीए सरकार पर जोरदार हमला कएने छथि। सोम (27 अप्रैल 2026) केँ तेजस्वी ‘एक्स’ पर पोस्ट कए दावा कएलनि जे बिहारक महिला सभसँ एनडीए सरकार विश्वासघात कएने अछि। हुनकर आरोप अछि जे सफेद झूठ बोलि महिला सभक भावनाकेँ दोहन कएल गेल आ करोड़ों महिला सभ संग दिनदेखाड़े धोखाधड़ी भेल।

तेजस्वी यादव कहलनि जे विधानसभा चुनावमे हारिक अंदेशा भ’ गेलाक बाद, मतदानक दिन तक बैंक खुलवाक’ मतदाता सभकेँ प्रभावित करय लेल महिला आ जीविका दीदी सभक खातामे 10 हजार रुपैया भेजल गेल। हुनका अनुसार, डर आ धमकी द’ कहल गेल जे मतदान केंद्र पर कैमरा लागल अछि, जँ खास पार्टीक निशान पर वोट नहि देब त’ खातामे आयल पैसा वापस लऽ लेल जाएत।

ओ कहलनि जे महिला सभकेँ प्रलोभन देल गेल जे चुनावक बाद 2 लाख रुपैया तकक सहायता देल जाएत, आ छह महीनाक भीतर अगिला किश्त खातामे जमा कएल जाएत। मुदा छह महीना बीत गेल अछि आ एखनि धरि महिला सभकेँ दोसर किश्त नहि भेटल अछि। हुनकर आरोप अछि जे सरकार एखनि कुर्सी बचाब’ केर खेलमे लागल अछि आ राज्यक वित्तीय स्थिति खराब भ’ गेल अछि।

तेजस्वी यादव दावा कएलनि जे चुनावक बाद मुख्यमंत्री महिला रोजगार योजनामे पंजीकृत 18 लाख महिला सभकेँ पहिल किश्तक राशि नहि देल गेल। संगहि 1 करोड़ 81 लाख जीविका दीदी आ महिला सभकेँ दोसर किश्त सेहो नहि भेटल अछि, जखनिकि चुनावक समय वादा कएल गेल छल जे एहि योजना तहत 2 लाख रुपैया देल जाएत।

सरकार पर हमला करैत तेजस्वी कहलनि जे केवल चुनावी फायदा लेल बिहारक मातृशक्ति संग धोखाधड़ी कएल गेल। महिला सभकेँ बाल-बच्चाक वर्तमान आ भविष्य संग खिलवाड़ कएल गेल, युवा सभक सपनाकेँ नाश कएल गेल आ शिक्षा, स्वास्थ्य आ कृषि जेकाँ क्षेत्र जोखिममे पड़ि गेल अछि। ओ कहलनि जे बिहारमे अराजक स्थिति उत्पन्न भ’ रहल अछि।

तेजस्वी अपन पोस्टमे ईहो कहलनि जे सरकार जानैत छल जे सीमित संसाधनक बावजूद चुनावक अंतिम समयमे 41 हजार करोड़ रुपैया बांटनाई आत्मघाती कदम अछि, मुदा कुर्सीक लालचमे राज्यहितक अनदेखी कएल गेल।