92,132 करोड़ रुपया कतय खर्च भेल, स्पष्ट जानकारी नहि अछि : तेजस्वी यादव

पटना। समदिया

विपक्षक नेता तेजस्वी यादव मुख्यमंत्री सम्राट चौधरीक नेतृत्वमे राजग सरकार पर कड़ा हमला कयलनि। ओ सोशल मीडिया पर लिखलनि कि राज्य केर वित्तीय संकटसँ जूझय वला “अनैतिक सरकार” हाल केर दिनमे दोसर बेर फंड निकासी आ व्यय नियंत्रणक संबंधमे एगो चिट्ठी जारी कयलक। तेजस्वी यादव आरोप लगौलनि कि अपन कुर्सी बचाबय लेल भ्रष्ट सेवानिवृत्त आ समझौता कय चुकल उच्च अधिकारी आ एजेंसीसँ डरि “भूंजा गैंग” निष्क्रिय मुख्यमंत्रीक संग मिलकय चुनावक आखिरी 30 दिनमे 41,000 करोड़ रुपयाक वितरण कय देलक।

तेजस्वी यादवक कहनाय छलनि जे महीनोसँ एनडीए सरकार लग बुजुर्गक सामाजिक पेंशन, छात्र क्रेडिट कार्डसँ भुगतान, छात्रवृत्ति, कर्मचारीक वेतन आ पेंशनक फंड समाप्त भ गेल अछि। हुनक अनुसार भ्रष्टाचारक कारण राज्यक खजाना खाली भ गेल अछि। ओ आगू कहलनि कि षड्यंत्र आ साजिशक माध्यमसँ बनल ई अस्थायी सरकार आब ब्याज वला ऋण पर निर्भर अछि। ई भ्रष्ट सरकार मात्र ब्याज भुगतान पर रोज 100 करोड़सँ बेसी रुपया खर्च कय रहल अछि। तेजस्वी दावा केलथि जे एनडीए सरकार बिहार पर 4 लाख करोड़ रूपयासँ बेसीक कर्जक बोझ द देलक अछि। ओ कहलनि जे राज्यक खजाना एतेक खाली अछि जे पूरा राज्य ठमकि गेल अछि आ कोनो विकास योजना लागू नहि भ रहल अछि।

तेजस्वी यादव सवाल उठेलथि जे एहन किएक अछि। ओ आरोप लगौलनि जे बिहार एकटा अयोग्य सरकार चला रहल अछि जकर नहि कोनो विजन अछि आ नहि रोडमैप। संगहि ओ आरोप लगौलनि जे भ्रष्टाचारमे डूबल एनडीए सरकार बिहारक खजानासँ रुपया निकालैत अछि, मुदा 92,132 करोड़ रुपया कतय खर्च भेल से नहि जनैत अछि। तेजस्वी कहलनि जे कैगक रिपोर्टसँ पता चलैत अछि जे डबल इंजनक सरकार 90 हजार करोड़ रुपयाक खर्चक उपयोग प्रमाण पत्र जमा करबामे विफल रहल। ओ कहलनि जे एकर मतलब इ अछि जे खर्च जरूर भेल, मुदा सरकार लग एहि बातक स्पष्ट जानकारी नहि अछि जे कोन काजमे खर्च भेल।