बिहारक पंचायत सभमे खुजत आधार सेवा केंद्र, पहिल चरणमे 2000 केंद्रक लक्ष्य
पटना । समदिया
पंचायती राज विभागक निदेशक नवीन कुमार सिंह वीडियो कॉन्फ्रेंसिंग केर माध्यमसँ बैठक केलनि। बिहारमे पंचायत स्तर पर आधार सेवा केंद्र खोलल जाएत। एहिसँ आधार कार्डसँ संबंधित समस्या केर समाधानमे सुविधा होयत। आधार कार्डसँ जुड़ल अन्य कार्य होयत। पहिल चरण मे 2000 केंद्र खोलबाक लक्ष्य राखल गेल अछि। एहि संबंधमे पंचायती राज विभागक निदेशक नवीन कुमार सिंह बुध (08 अप्रैल, 2026) केँ जानकारी देलनि।
नवीन कुमार सिंह उत्तर बिहारक 21 जिला (पूर्वी चंपारण, समस्तीपुर, मुजफ्फरपुर, दरभंगा, गोपालगंज, अररिया, पश्चिम चंपारण, सुपौल, वैशाली, बेगूसराय, मधेपुरा, मधुबनी, कटिहार, पूर्णिया, सारण, सीवान, खगड़िया, सहरसा, शिवहर, किशनगंज आ सीतामढ़ी) केर उप-विकास आयुक्त, जिला पंचायत राज पदाधिकारी आ जिला परिषदक अपर मुख्य कार्यपालक पदाधिकारी सभक संग वीडियो कॉन्फ्रेंसिंगक माध्यमसँ बैठक कयलनि। एहि दरम्यान कतेको दिशा-निर्देश देल गेल।
नवीन कुमार सिंह कहलनि जे राज्यक सभ पंचायत सभमे आधार सेवा केन्द्र खोलबा लेल विभाग तेजीसँ काज कऽ रहल अछि। प्रथम चरणमे राज्यक 2000 पंचायत सभमे आधार सेवा केन्द्र खोलबाक लक्ष्य निर्धारित कएल गेल अछि। बैसारमे सम्मिलित पदाधिकारी सभकेँ निर्देश देल गेल जे 15 अप्रैल धरि सभ प्रक्रिया पूरा कऽ चयनित ग्राम पंचायत सभमे अनिवार्य रूपसँ आधार सेवा केन्द्र शुरू कऽ देल जाए।
मुख्यमंत्री नीतीश कुमार द्वारा घोषित ‘सबहक सम्मान, जीवन आसान’क तहत एक अप्रैल 2026 सँ मृतकक परिजन सभकेँ 24 घंटामे मृत्यु प्रमाण-पत्र निर्गत करबाक निर्देश जारी कएल गेल अछि। एहि संबंधमे नवीन कुमार सिंह निर्देश देलनि जे पंचायत सभमे स्थित मोक्षधाम/कब्रिस्तानमे अन्त्येष्ठि केर बाद 24 घंटामे मृत्यु प्रमाण-पत्र निर्गत कएल जाए। ओ विभागकेँ शीघ्र प्रतिवेदन समर्पित करबाक लेल पदाधिकारी सभकेँ निर्देश देलनि। एकर अलावा 24 घंटामे निर्गत मृत्यु प्रमाण-पत्र सभक संख्या केर नियमित रूपसँ समीक्षा करबाक सेहो निर्देश देल गेल।
