खड़गे जतौलनि अपन बयान पर खेद, कहलनि- गुजरातक लोकक भावनाक आहत करब हमर उद्देश्य नहिं
नई दिल्ली । समदिया
कांग्रेसक राष्ट्रीय अध्यक्ष मल्लिकार्जुन खड़गे बुधदिन अपन ओहि बयान पर खेद प्रकट कयलथि, जाहिमे ओ केरलमे एकटा चुनावी रैली दौरान गुजरातक लोकक लेल विवादित टिप्पणी कयने रहथि। ओ कहलन्हि जे गुजरातक लोकक भावनाक आहत करब हमर उद्देश्य नहि छल। गुजरातक लोकक प्रति हमर मनमे सदा सर्वोच्च सम्मान रहत। मल्लिकार्जुन खड़गे ई सेहो आरोप लगेलनि जे हमर किछु बातकेँ जानबूझि क’ गलत तरीकासँ प्रस्तुत कएल जा रहल अछि।
कांग्रेस अध्यक्ष मल्लिकार्जुन खड़गे सोशल मीडिया प्लेटफॉर्म एक्स पर लिखलन्हि, “हालहिमे केरलमे देल गेल हमर एकटा चुनावी भाषणक किछु टिप्पणीकेँ जानबूझि क’ गलत तरीकासँ प्रस्तुत कएल जा रहल अछि। तथापि, हम अपना दिससँ जिम्मेदारीक संग खेद व्यक्त करैत छी।”
ओ आगाँ लिखलखिन्हि, “गुजरातक लोकक प्रति हमर मनमे सदा सर्वोच्च सम्मान रहल अछि आ सदा रहत। ओतयकेँ लोकक भावनाक आहत करब हमर कखनो उद्देश्य नहिं छल।”
ओम्हर, मल्लिकार्जुन खड़गे केर ‘अनपढ़ गुजराती’ टिप्पणी पर विवादक कारण गुजरातक लोक दिल्ली स्थित कांग्रेस मुख्यालयक बाहर विरोध प्रदर्शन कयलनि आ मल्लिकार्जुन खड़गेक बयानक कड़ा आलोचना कयलनि। प्रदर्शनकारी सभ अपन हाथमे पोस्टर-बैनर लऽ कऽ आ नारेबाजी करैत कांग्रेस अध्यक्षक खिलाफ गुस्सा जाहिर केलनि।
एहि दौरान एकटा प्रदर्शनकारी कहलनि, “गुजराती पढ़ल-लिखल आ मेहनती होइत अछि आ एहि कारण ओ सफल भऽ रहल छथि। जे लोक गुजराती सभकेँ बुरा-भला कहि रहल छथि, ओ सभ गलत छथि। गुजराती शिक्षित छथि आ एहि कारणे ओ देशक प्रगतिमे योगदान दऽ रहल छथि।”
जनतब जे केरलक चुनाव प्रचारक दौरान कांग्रेस अध्यक्ष मल्लिकार्जुन खड़गे गुजरातक लोकक ऊपर विवादास्पद टिप्पणी कयलनि। ओ अपन भाषणमे कहलनि, “केरलक लोक ‘शिक्षित आ समझदार’ छथि आ हुनका गुमराह नहि कएल जा सकैत अछि। अहाँ (भाजपा) गुजराती वा दोसर ठामक ओ लोकसभ जे अनपढ़ छथि, तिनका सभकेँ मूर्ख बना सकैत छी, मुदा अहाँ केरलक लोककेँ मूर्ख नहि बना सकैत छी।”
