राज्यसभामे 19 सांसदक शपथ, मेनका गुरुस्वामी देशक पहिल LGBTQ+ सांसद
नई दिल्ली । समदिया
भारतीय संसदीय इतिहासमे सोमकेँ एकटा नव अध्याय जुड़ि गेल। राज्यसभा केर सभापति सीपी राधाकृष्णन काल्हि राज्यसभा कक्षमे नव निर्वाचित आ पुनः निर्वाचित 19 सदस्य सभकेँ पद आ गोपनीयता केर शपथ दिऔलनि। एहि शपथ ग्रहण समारोहक मुख्य आकर्षण प्रसिद्ध संवैधानिक वकील डॉ. मेनका गुरुस्वामी रहलीह। ओ पश्चिम बंगालसँ तृणमूल कांग्रेस (टीएमसी) केर सांसदक रूपमे शपथ लेलनि। मेनका गुरुस्वामी देशक पहिल एहेन सांसद छथि, जे सार्वजनिक रूपसँ अपन पहचान एकटा क्वीर (LGBTQ+) व्यक्तिक रूपमे साझा कयने छथि।
कानूनी लड़ाईसँ संसद धरि केर यात्रा
51 वर्षीय डॉ. मेनका गुरुस्वामी केर राज्यसभा पहुँचनाइ सामाजिक आ राजनीतिक रूपसँ बहुत महत्वपूर्ण मानल जा रहल अछि। ऑक्सफोर्ड आ हार्वर्ड जेहेन संस्थानसँ शिक्षित गुरुस्वामीकेँ 2018मे सुप्रीम कोर्टमे धारा 377 केर खिलाफ ऐतिहासिक कानूनी जीत लेल जानल जाइत अछि, जाहिसँ समलैंगिकताकेँ अपराधक श्रेणीसँ बाहर कएल गेल।
टीएमसी अपन रणनीतिक तहत हुनका उच्च सदन भेजने अछि, जाहिसँ संसदमे संवैधानिक मूल्य आ नागरिक अधिकारक आवाजकेँ मजबूती भेटय। शपथ लेलाक बाद गुरुस्वामी कहलनि जे ओ संविधानक समानता आ भेदभाव रहित मूल्यकेँ आगाँ बढ़ाबैत रहतीह।
एहि समारोहमे कुल 19 सदस्य सभ शपथ लेलनि, जाहिमे अनुभवी नेता आ नव चेहरा दुनू शामिल छलथि। शपथ लेनिहार सदस्य सभमे रामदास बंधु आठवले, माया चिंतामन इवनाते, शरदचंद्र पवार, रामराव सखाराम वडकुते, डॉ. ज्योति नागनाथ वाघमारे, क्रिस्टोफर मणिकम, डॉ. अंबुमणि रामदास, कॉन्सटेंटाइन रवींद्रन, एल के सुधीश, डॉ. एम थंबीदुरई, तिरुचि शिवा, बाबुल सुप्रिया बराल, डॉ. मेनका गुरुस्वामी, राजीव कुमार, रुक्मिणी मलिक (कोयल मलिक), बिस्वजीत सिन्हा, संतृप्त मिश्रा, दिलीप कुमार रे आ मनमोहन सामल शामिल छथि।
शपथ ग्रहण समारोहमे भारतक ‘विविधतामे एकता’ केर साफ झलक देखएकेँ मिलल। कुल 19 सदस्यमे सँ 6 सदस्य तमिलमे, 4 बंगालीमे, 3 मराठीमे, 3 ओड़ियामे, 2 हिंदीमे आ 1 सदस्य अंग्रेजीमे शपथ लेलनि।
एहि बेर राज्यसभामे तमिलनाडुसँ 6, महाराष्ट्रसँ 5, पश्चिम बंगालसँ 5 आ ओडिशासँ 3 सदस्य चुनिकेँ एलथि।
एहि अवसर पर संसदीय कार्य आ अल्पसंख्यक कार्य मंत्री किरेन रिजिजू, जनजातीय कार्य मंत्री जुअल ओराम, राज्यसभा केर महासचिव पीसी मोदी आ सचिवालय केर आन वरिष्ठ अधिकारी सभ सेहो उपस्थित छलथि।
