मिथिलाक पारंपरिक एवं लोक गीत संगीत पर आधारित नृत्यक उदीयमान नृत्यांगना तनिष्का झा
दिल्ली समदिया!! मूल रूपसॅं मधुबनी जिलाक बसैठ रानीपुर निवासी मनोज झा एवं खुश्बू झाक सुपुत्री, मात्र ११ वर्षक छथि आ बी सी सी मोडर्न पब्लिक स्कूल रोहिणी , दिल्लीक सातम कक्षाक मेधावी छात्रा छथि ।
तनिष्का, कत्थक नृत्य केर प्रशिक्षित दक्ष कलाकार छथि, संगहि मैथिली गीत संगीत पर आधारित नृत्य प्रस्तुतिमे पारंगत छथि। दिल्लीमे लगभग समस्त विद्यापति समारोहमे अपन नृत्य प्रस्तुति द’ चुकल छथि, जाहिमे अखिल भारतीय मिथिला संघ , पालम द्वारका, दुल्लूपुरा , किराड़ी आदि उल्लेखनीय अछि । रोहिणी, दिल्ली स्थित प्रमुख संस्था “इंद्रप्रस्थ मैथिल मंच” आ ‘मिथिला सेवा संस्थान’ केर आयोजन सभमे नियमित रूपसॅं हिनकर सहभागिता रहैत अछि। हालहिमे चंडीगढ़मे आयोजित बिहार दिवस कार्यक्रममे हिनक नृत्य प्रस्तुति केर खूब प्रशंसा भेल छल।
एहि मैथिल धियाक बढैत लोकप्रियता हिनक उज्ज्वल भविष्य केर संकेत मानल जा सकैत अछि।
