सांसद गोपालजी ठाकुर संसदमे मिथिलामे बंद पड़ल औद्योगिक इकाईकेँ पुनः चालू कराबय केर रखलनि मांग

दिल्ली । समदिया

दरभंगाक कर्मयोगी सांसद गोपालजी ठाकुर काल्हि शुक्रकेँ लोकसभामे शून्यकालक दौरान मिथिलामे बंद पड़ल औद्योगिक इकाईकेँ पुनः चालू करय केर मांग कयलनि। ओ संसदमे मैथिलीमे अपन बात राखैत मिथिला क्षेत्रमे उपलब्धिपूर्ण विकास परियोजनासभ एवं मैथिली भाषाक लेल  कयल गेल अभिनंदनीय पहल आ कार्य हेतु श्रद्धेय पुर्व प्रधानमंत्री अटल बिहारी वाजपेई सहित मोदी सरकार केर आभार जतेलनि। ओ ओम बिड़ला द्वारा मैथिली भाषामे लोकसभामे बाजय हेतु अनुमति देबय लेल आभार जतौलनि। पुनः मोदी सरकार द्वारा मैथिली भाषामे संविधान लिखाबय एवं महामहिम राष्ट्रपति द्वारा विमोचन कराबय लेल सेहो आभार व्यक्त कयलनि। तहिना अयोध्यामे राम मंदिरक तर्ज पर पुनौराधाम, सीतामढ़ीमे जानकी मंदिर बनाबय लेल भूमि पूजन एवं ८५० करोड़ फंड देबाक घोषणा लेल सेहो आभार जतौलनि। तहिना मखान बोर्ड, मिथिला मखानक जीआई टैग, पाग पर डाक टिकट, एम्स, एअरपोर्ट, आईटी पार्कक लेल साढ़े एग्यारह हजार करोड़ फंड, पश्चिमी कोशी तटबंधक लेल साढ़े छः हजार करोड़ फंड आदिक लेल सेहो भाजपा सरकारकेँ धन्यवाद देलनि आ आभार जतौलनि। संगहि सांसद गोपालजी ठाकुर मिथिला क्षेत्रमे कतेको दशकसँ बंद पड़ल औद्योगिक इकाईकेँ पुनः चालू करय केर माँग सरकारसँ कयलनि ताकि मिथिला क्षेत्रमे स्थानीय स्तर पर रोजगारक सृजन होए एवं पलायनक समस्याक समाधान भऽ सकय।