आ फोरमक एकटा आर उपक्रम ‘पुनर्जागरण शिक्षण-प्रशिक्षण संस्थान’क शुभारंभ

प्रशिक्षक नवल किशोर कुमार महतो बृहस्पतिकेँ पढ़ौलनि DCA केर प्रथम पाठ।
मधुबनी समदिया!! मैथिल पुनर्जागरण प्रकाश फोरम’ मिथिला-मैथिलीक अस्तित्व संरक्षणक लेल अपन साधल डेगसँ बढ़ि रहल अछि आ एक-एकटा उपक्रम सभमे गति दऽ रहल अछि। एहि क्रममे आर एकटा उपक्रम निःशुल्क ‘पुनर्जागरण शिक्षण-प्रशिक्षण संस्थान’ काल्हि १९-०२-२०२६, बृहस्पतिकेँ शुभारंभ कयलक अछि। एहि उपक्रममे कम्प्यूटरक DCA कोर्स, देवनागरी अर्थात मैथिली/हिन्दी एवं रोमन अर्थात अंग्रेजी टाइपिंग केर छः मासक कोर्स अछि।

काल्हि बृहस्पतिकेँ प्रशिक्षक नवल किशोर कुमार महतो प्रशिक्षुगणकेँ नवीन बैचक प्रथम पाठ पढ़ौलनि। एहि अवसर पर अजय नाथ झा शास्त्री सहित फोरमक सभ संरक्षकगण प्रशिक्षक आ प्रशिक्षुगण एवं एकर सहयोगीगणकेँ शुभकामना एवं अभिनंदन प्रकट कयलन्हि अछि।

मुख्य बात ई रहल जे प्रशिक्षुगण मैथिलीक प्रति स्वाभिमान देखौलनि आ प्रशिक्षकक पुछला पर जे अहाँ सभकेँ कोन भाषामे पढ़ाओल जाए, ताहि पर मैथिली भाषाक चयन कयलनि आ प्रथम दिवस मैथिलीए भाषामे पढ़ाओल गेल, जकर विडियो चर्चामे आबि गेल अछि, यद्यपि एखनि प्रावधान हिन्दी, अंग्रेजी आदि सभ भाषाक राखल गेल अछि आ सिखनाहरक रुचि पर निर्भर रहतै जे ओ कोन भाषाक चयन करथि। कहय केर तात्पर्य ई जे संस्थान एखनि भाषाक कोनो बाध्यता नहिं रखने अछि, यद्यपि मूलमे सोच मैथिली अवश्य छैक।