बिहार साहित्य सम्मेलनक 44म महाधिवेशनमे सम्मानित भेलीह राँचीक साहित्यकार निर्मला कर्ण

पटना समदिया !! रवि दिन 21 दिसंबर कें पटना स्थित बिहार हिन्दी साहित्य सम्मेलन भवन मे आयोजित बिहार हिन्दी साहित्य सम्मेलनक 44म महाधिवेशन केर दोसर दिन आयोजित समापन समारोहमे विशिष्ट अतिथि बिहार राज्य उपभोक्ता संरक्षण आयोगक अध्यक्ष न्यायमूर्ति संजय कुमार द्वारा रमणिका गुप्ता स्मृति सम्मान सौं सम्मानित भेलीह। खराजपुर, दरभंगा गामक संतति एवं वरिष्ठ कवयित्री निर्मला कर्ण जीकें ई सम्मान हिन्दी भाषा एवं साहित्यक उन्नतिमे मूल्यवान योगदान हेतु प्रदान कएल गेलन्हि।

जनतब द दी जे सिख धर्मक नवम गुरु गुरु तेग बहादुर महाराजक 350म बलिदान वर्षकें समर्पित एहि दू- दिवसीय महाधिवेशनक उद्घाटन शनि दिन बिहारक राज्यपाल आरिफ मोहम्मद खान द्वारा कएल गेल। प्रथम दिन समारोहक मुख्य अतिथि छलाह सिक्किम केर पूर्व राज्यपाल गंगा प्रसाद। एहि समारोहमे सातटा वैचारिक सत्रक अतिरिक्त सांस्कृतिक कार्यक्रम, कवि सम्मेलनक संग सम्मान सह समापन समारोह आयोजित भेल।

बिहार हिन्दी साहित्य सम्मेलनक एहि महाधिवेशनमे अनेक विद्वान, दार्शनिक, साहित्यकार, विषय विशेषज्ञ एवं साहित्यानुरागी उपस्थित छलथि। एहि अवसर पर हिन्दी साहित्य सम्मेलनक खचाखच भरल विशाल सभागारमे विभिन्न विधाक करीब पचास गोटेकें सम्मानित कएल गेल।