झारखंड मैथिली मंच, राँचीक तत्वावधानमे मैथिली अधिकार दिवस पर अनेक कार्यक्रम

राँची समदिया!! झारखण्ड मैथिली मंच, राँचीक तत्वावधानमे विद्यापति दलान हरमूक सामने छठि तालाब परिसरमे एक संग कतेको कार्यक्रमक आयोजन भेल।
समस्त कार्यक्रम मैथिली अधिकार दिवसकेँ समर्पित छल।

सर्वप्रथम मंच सदस्य समूहमे मिथिलाक पारंपरिक परिधान धोती-कुरतामे विद्यापति दलानसँ चलिकें मेन रोड कडरू मोर पर पहुंचि ओतय अवस्थित बाबा विद्यापतिक मूर्ति पर माल्यार्पण कय नमन कयल गेल।

छठ तालाब परिसरमे
कार्यक्रमक शुरुआत अतिथिगणकेँ मंचासीन कराबय केर बाद विद्यापतिक चित्र पर पूष्पांजलि अर्पित कयल गेल। तदुपरांत परंपरानुसार विद्यापति रचित भगवती बंदना जय जय मैरवि असुर भयावनि –एवं राष्ट्रगान भेल। अतिथि एवं मंचक पदाधिकारीक द्वारा संयुक्त रूपसँ दीप प्रज्वलित कऽ विधिवत कार्यक्रम प्रारंभ भेल। अतिथिगणकेँ पाग एवं शाल दऽ कऽ स्वागत कयल गेल।

महासचिव जयंत कुमार झा आजुक समस्त कार्यक्रमक चर्चा करैत अतिथि एवं उपस्थित मैथिली प्रेमीक अभिवादन कयलनि।

तत्पश्चात डा.भीमनाथ झा विरचित भावांजलि, साहित्य मूर्ति (सपादन हितनाथ झा, प्रकाशक झारखण्ड मैथिली मंच, राँची),पुस्तकक विमोचन भेल। डा.कृष्ण मोहन झा, प्रमोद कुमार झा, हितनाथ झा उक्त पुस्तक पर अपना उद्गार ब्यक्त कयलनि।

रूपा देवी विदेह साहित्य सम्मान 2025 प्रो.महेंद्र झाकेँ हुनक रचना “धात्री पात सन गाम” संसमरण पुस्तकक लेल प्रदान कयल गेल। अध्यक्ष बिनय कुमार झा अतिथिगणक स्वागत कयलनि। मोहन झा परोसी सम्मान हेतु पुस्तक चयन प्रक्रियाक विस्तारसँ जानकारी देलनि। हितनाथ झा सम्मानमे प्रशस्ति पत्र पढिकेँ ससम्मान प्रो.महेन्द्रकेँ समर्पित कयलनि।

कार्यक्रममे मुख्य अतिथि शशि प्रकाश झा ,आई. ए.एस.( निदेशक अभियान राष्ट्रीय स्वास्थ्य मिसन), ,डा.विद्यानाथ झा विदित, केदार कानन पुस्तकक चर्चाक संग प्रो. महेंद्रकें उत्कृष्ट रचना एवं सम्मानक लेल बधाई एवं शुभकामना देलनि।

प्रो. महेंद्र आभार ब्यक्त करैत अपन उद्गार ब्यक्त कयलनि। प्रो.महेन्द्रकेँ मुख्य अतिथि शशि प्रकाश झा एवं अध्यक्ष बिनय कुमार झा, महासचिव जयंत कुमार झा एवं कोषाध्यक्ष संतोष कुमार मिश्र 35000/-केर चेक पाग शाल एवं स्मृति चिन्ह दऽ कऽ सम्मानित कयलनि ।

अंतिम सत्रमे पंचांग सह कैलेण्डर लोकार्पणमे मुख्य अतिथि ललित कुमार चौधरी महाप्रबंधक कोल ईंडिया लिमि.केँ संग मंचक पदाधिकारी सम्मिलित भेलथि। मंचक संरक्षक सह पूर्व पार्षद अरुण कुमार झा अतिथिगणक स्वागत कयलनि।प्रेम चन्द्र झा पंचांग सह कैलेण्डरक उपयोगिता आदि संदर्भमे विस्तृत जानकारी देलनि ।जयंत कुमार झा अपना अनुभव एवं विचार लोकक संग साझा कयलनि।

धन्यवाद ज्ञापन भारतेन्दु कुमार झा कयलनि। मंच संचालन बद्री नाथ झा एवं ब्रज कुमार झा कयलनि। अंतमे पारंपरिक भोजन चूरा-दही गुड़ व
सब्जीक लोकसभ आनंद लेलनि।

कार्यक्रमकें सफल बनाबयमे
अध्यक्ष बिनय कुमार झा, महासचिव जयंत कुमार झा, कोषाध्यक्ष संतोष कुमार मिश्र, नरेश झा, रंधीर झा, बाबू लाल झा, मोहन झा परोसी, कौशल किशोर झा, आत्मेश्वर झा, ब्रज कुमार झा,भारतेन्दु कुमार झा, सतीश कुमार मिश्र सुकुमार नाथ झा सहित अन्य सदस्य सभ भागीदारी निभेलनि। आयोजनमे सैकड़ों लोक हिस्सा लेलनि।