मैथिल समाज उत्तर प्रदेश द्वारा सम्मानित भेलाह दरभंगा बार एसोसिएशनक अध्यक्ष सी. डी. मल्लिक

वाराणसी समदिया!! दरभंगा बार एसोसिएशनक अध्यक्ष एवं कर्ण कायस्थ महासभा बिहार प्रदेशक पूर्व अध्यक्ष चन्द्रधर मल्लिक वाराणसीमे आयोजित महाकवि विद्यापति महोत्सवमे रविकेँ सम्मानित कएल गेलन्हि। 13-14 दिसंबरकेँ आयोजित दू – दिवसीय सांस्कृतिक महाकुम्भमे संस्थाक अध्यक्ष निरसन कुमार झा, अधिवक्ता चंद्रधर मल्लिक (अधिवक्ता एवं अध्यक्ष, दरभंगा बार एसोसिएशन) कें पाग, चादर एवं विद्यापतिक स्मृति चिह्न प्रदान कs सम्मानित कएलन्हि।

एहि अवसर पर उपस्थित मिथिलाक सुप्रतिष्ठित कलाकार दास पुष्कर समेत अनेक गणमान्य लोकनि मैथिली भाषा एवं संस्कृतिक प्रबल पक्षधर वकील साहेब मल्लिकक भूरि-भूरि प्रशंसा कएलन्हि।

दरभंगा बार एसोसिएशनक अध्यक्ष मल्लिककें बधाई दैत केकेएम बिहार प्रदेश अध्यक्ष डॉ. विनय कर्ण अपन सन्देशमे कहलन्हि जे हिनक सम्मानसौं हम सब अत्यन्त गौरवान्वित महसूस कs रहल छी। वकील साहेबक जीवन हमरा सभक लेल हर्ष, गौरव आ प्रेरणाक विपुल भंडार थिक। केकेएम परिवार हिनक स्वस्थ एवं सुखद भविष्यक लेल अशेष मंगलकामना कामना करैत अछि।