मिथिलाक्षर साक्षरता अभियानक पंचतारांकित उत्कृष्ट सम्मानसँ सम्मानित हेताह शंकर नाथ आ दीपक आनंद
निज समदिया!! मिथिलाक्षर साक्षरता अभियानक १२म सम्मान समारोह २८ दिसम्बर २०२५ केँ आयोजित होबय केर घोषणा भेल अछि। प्राप्त जानकारीक अनुसार ई समारोह राँचीक झारखंड मैथिली मंचक ‘विद्यापति दलान’ स्थल पर होएत। जनतब जे मिथिलाक्षर साक्षरता अभियान आब ‘मैथिल पुनर्जागरण प्रकाश फोरम जे कम्पनी अधिनियम एवं सेक्शन 8 केर अधीन पंजीकृत ट्रस्ट अछि, तकर उपक्रम अछि, फलतः एहि समारोहक आयोजक अछि ‘मैथिल पुनर्जागरण प्रकाश फोरम।’
२१म शताब्दीमे पुनः मिथिलाक्षरक उदय करबैवाला ‘मिथिलाक्षर साक्षरता अभियान’क ई बारहम सम्मान समारोह अछि। अभियानमे विभिन्न अवदानक लेल कतेको प्रकारक सम्मानक विधान अछि। एतय सभसँ पहिने त्रैमासिक पाठ्यक्रमक तीनटा परीक्षामे उत्तीर्ण भेलाक बाद ‘मिथिलाक्षर प्रवीण’ होइत छथि आ ई मुख्य पात्रता अछि एवं प्रथम तारांकित अभियानीक सम्मान प्राप्त करैत छथि। पुनः ‘सिखू-सिखाउ’ केर राह पर अभियानी आगू बढ़ैत छथि एवं क्रमशः दुइ तारांकित मार्गदर्शक, तीन तारांकित निर्देशक, चारि तारांकित संरक्षक सम्मान अपन कर्तव्यनिष्ठताक आधार पर पाबैत छथि।
मुदा किछु अभियानी अपन अद्भुत लगन, निष्ठा, सेवा आ अपन माटिक लेल उत्तम कोटिक स्वाभिमान देखबैत अभियानमे विशेष सम्मान पंचतारांकित उत्कृष्ट सम्मानक अधिकारी बनैत छथि।
तऽ मिथिलाक्षर साक्षरता अभियानक शीर्षस्थ सम्मानमे सँ ई एकटा सम्मान अछि *’उत्कृष्ट सम्मान’*, जे पंचतारांकित सम्मान अछि। एखनि धरि आठ चरणमे कुल २० टा अभियानीगणकेँ मात्र ई सम्मान भेटल अछि।
मैप्रुप्र समदियाकेँ भेटल जानकारीक अनुसार नवम चरणमे दिनांक १२-१२-२०२५ केँ *’उत्कृष्ट सम्मान’क* लेल दुइ टा अभियानीक नाम चयनित भऽ घोषित भेल जे क्रमशः उत्कृष्ट संरक्षक शंकर नाथ मिश्र १३/१२२/०९ एवं उत्कृष्ट संरक्षक दीपक आनंद मल्लिक ४१/६९/०९ छथि।
जनतबक अनुसार संस्थापक अजय नाथ झा शास्त्री सहित समस्त अभियानी एवं अनेकानेक आओर मिथिलावासीक धरातल मिथिला, शहर, नगर, महानगर एवं विदेशक पच्चिसो टा देशमे बसल मिथिलावासी ओ अभियानीगणक अभिनंदन भेटि रहल छनि।
जनतब जे राँचीक एहि समारोहमे पहिलुक घोषित उत्कृष्ट सम्मानक अभियानीगण, जे पहिलुक सम्मान समारोहमे उपस्थित नहिं भऽ सकल छलथि, मुदा एहि समारोहमे उपस्थित भऽ रहल छथि, सेहो सभ ई पंचतारांकित उत्कृष्ट सम्मानसँ सम्मानित हेताह/हेतीह, जिनकर सभक नाम अछि :- उत्कृष्ट संरक्षिका अनीता झा ०८/१८/०८, उत्कृष्ट संरक्षिका रिंकू झा २१/३०/०८ एवं उत्कृष्ट संरक्षिका उमा झा २३/३०/०८
