मैथिली परिषद मुजफ्फरपुर कयलक विद्यापति पर्व समारोहक आयोजन
मैथिली परिषद मुजफ्फरपुर कयलक विद्यापति पर्व समारोहक आयोजन
मुजफ्फरपुर समदिया!! 
मैथिली परिषद, मुजफ्फरपुर 16 नवम्बर 2025, रवि दिन संध्या काल विद्यापति पर्व समारोहक आयोजन खादी भंडार मार्ग स्थित एक विवाह भवनमे भेल। कार्यक्रमक प्रारंभ मुख्य अतिथि ब्रज मोहन झा, अशोक झा, मैथिली परिषद, मुजफ्फरपुर केर पूर्व अध्यक्ष गंगा झा, वर्तमान अध्यक्ष बेबी चौधरी एवं सचिव अजयानन्द झा द्वारा दीप प्रज्वलन एवं बाबा विद्यापतिकेँ माल्यार्पणसँ भेल।
प्रोफेसर नूतन झा बाबा विद्यापति रचित भगवती वन्दना जय जय भैरवि गाबि सांस्कृतिक कार्यक्रमक प्रारंभ कैलनि। तत्पश्चात् सृष्टि कुमारी द्वारा गणेश वन्दना एवं सरस्वती वन्दना पर भव्य नृत्यक प्रस्तुति दर्शक दीर्घामे उपस्थित सब लोकनिकेँ करतल ध्वनि करबा लेल बाध्य कयलक।
मंच संचालन अश्विनी कुमार वर्मा कयलनि। स्वागत गीत मैथिली परिषदक सदस्य उदय कुमार झा प्रस्तुत कयलनि।
गीत नाद हेतु स्थानीय कलाकार सबहक अतिरिक्त राम बाबू झा, डाॅली सिंह एवं छोटू कृष्णाक दल बड्ड नीँक प्रस्तुति देलनि। आजुक कार्यक्रम केर विशिष्ट आकर्षण रहल जय प्रकाश पाठक एवं हुनक दल द्वारा नृत्यक प्रस्तुति जे दर्शक वृन्दकेँ भाव विभोर क’ देलक।
विशिष्ट अतिथिगण एवं परिषदक अध्यक्ष बेबी चौधरी अपन मोनक उद्गार व्यक्त कयलनि। अहि अवसर पर जदयू केर प्रवक्ता अभिषेक झा सेहो उपस्थित भ’ अपन मोनक उद्गार व्यक्त कयलनि। विद्यापति पर्व समारोहक आयोजन सफलतापूर्वक सम्पन्न भेल।
