‘भारत-मंगोलियाक संबंध आध्यात्मिक आ आत्मीय बंधन पर आधारित’ – पीएम मोदी

      नई दिल्ली !!
प्रधानमंत्री नरेंद्र मोदी मंगलकेँ मंगोलियाक राष्ट्रपति खुरेलसुख उखना आ हुनकर प्रतिनिधिमंडल केर भारत आगमन पर गर्मजोशीसँ स्वागत कयलनि। एहि यात्राकेँ बहुत रास अर्थमे ऐतिहासिक मानल जा रहल अछि, कारण छः वर्षक बाद पहिल बेर कोनो मंगोलियाई राष्ट्रपति भारत आएल छथि। ई यात्रा ओहि समय भ’ रहल अछि जखनि भारत आ मंगोलिया अपन कूटनीतिक संबंधक 70 वर्ष आ रणनीतिक साझेदारीक 10 वर्ष पूरा क’ रहल अछि। एहि खास अवसर पर दुनू देश एकटा संयुक्त डाक टिकट जारी कयलक, जे भारत-मंगोलियाक साझा विरासत, विविधता आ गहिंर सभ्यतागत संबंधक प्रतीक थिक।

एहि अवसर पर प्रधानमंत्री मोदी अपन संबोधनमे कहलनि, “राष्ट्रपति खुरेलसुख उखनाक स्वागत करब हमरा लेल बहुत प्रसन्नताक विषय अछि। हमर भेटक शुरुआत ‘एक पेड़ मांक नाम’ अभियानक तहत वृक्षारोपणसँ भेल। राष्ट्रपति अपन स्वर्गीय माताजीक नाम एकटा वटवृक्ष लगौने छथि, जे आबि रहल पीढ़ी तक हमर मित्रता आ पर्यावरणक प्रति हमर साझा प्रतिबद्धता केर प्रतीक बनल रहत।”

प्रधानमन्त्री मोदी आगू कहलनि जे दस साल पहिले मंगोलिया यात्राक दौरान दुनू देश अपन सम्बन्धकेँ रणनीतिक साझेदारीक रूप देलक। ओ कहलनि, “पछिला एक दशकमे हमर साझेदारीक हरेक आयाममे नव गहराई आ विस्तार आएल अछि। रक्षा आ सुरक्षा सहयोग लगातार मजबूत भेल अछि।”

प्रधानमन्त्री इहो कहलनि जे भारत आ मंगोलियाक सम्बन्ध मात्र राजनयिक सम्बन्ध तक सीमित नहि अछि, बल्कि ई आध्यात्मिक आ आत्मीय बंधन पर आधारित अछि।”

ओ कहलनि, “हमर सम्बन्धक असल गहराई हमर पीपल-टू-पीपल-टाइजमे देखाइत अछि। कतेको सदीसँ दुनू देश बौद्ध धर्मक सूत्रमे बन्हल अछि। एहि कारणे हमरा ‘स्पिरिचुअल सिबलिंग’ कहल जाइत अछि। हमरा ई कहैत खुशी भऽ रहल अछि जे आगूक वर्ष भगवान बुद्धक दुटा महान शिष्य सारिपुत्र आ मौद्गल्या-यनक पवित्र अवशेष भारतसँ मंगोलिया पठाओल जायत। ई डेग दुनू देशक बीच बौद्धिक आ धार्मिक सम्बन्धकेँ आरो गहिंर करत।”

एकर अतिरिक्त, भारत ‘गंदन मॉनेस्ट्री’मे एकटा संस्कृत शिक्षक सेहो पठाओत, जाहिसँ ओतय बौद्ध ग्रंथक अध्ययन आ प्राचीन भारतीय ज्ञान परंपराकेँ आगू बढ़ाओल जा सकय।

प्रधानमंत्री कहलनि, “हमर संबंध राजनीतिक सीमासँ परे अछि। यद्यपि भारत आ मंगोलियाक सीमा एक दोसरसँ नहि जुड़ल अछि, मुदा भारत सदा मंगोलियाकेँ अपन पड़ोसी मानैत अछि।”

पीएम मोदी कहलनि जे भारत मंगोलियासँ मिलिकय विकासशील देशसभक आवाजकेँ वैश्विक मंच सभ पर आओर सशक्त करत।

पीएम मोदी कहलनि जे भारत एहि अवसर पर मंगोलियाई नागरिक सभक लेल मुफ्त ई-वीजा सुविधा देबय केर घोषणा सेहो कयलक अछि, जाहिसँ दुनू देशक नागरिक सभक बीच संपर्क आ यात्रामे सहजता होय।

प्रधानमंत्री मोदी कहलनि, “हमर सीमासभ भले नहि जुड़ल होय, मुदा हमर दिल जुड़ल अछि। भारत आ मंगोलियाक मित्रता समयक संग आओर मजबूत होयत।”

एहि बैठककेँ दुनू देशक बीच सांस्कृतिक, धार्मिक आ रणनीतिक सहयोगक नव अध्यायक शुरुआत मानल जा रहल अछि।

आर अनेक समाचार पढ़य लेल एहि लिंकसँ पढ़ि सकैत छी ई-पेपर आ डाउनलोड सेहो कऽ सकैत छी बिल्कुल निःशुल्क mppdainik.com/e-paper