मिथिलाक्षर साक्षरता अभियानक दिल्ली अधिवेशन भेल सफलतापूर्वक संपन्न
*
अभियानीगणमे नव ऊर्जा-उत्साहक भेल संचार, दिल्ली एनसीआरक केंद्रीय आ जिला स्तरीय टीमक भेल गठन।
*
दिल्ली समदिया
*
निर्धारित कार्यक्रमक अनुसार दिनांक ३१/०८/२०२५, रविकेँ मिथिलाक्षर साक्षरता अभियानक दिल्ली एनसीआर अधिवेशन दिल्लीक ‘आस्था कुंज’ पार्क, नजदीक कालकाजी मंदिरमे सफलतापूर्वक संपन्न भेल। जनतबक अनुसार दिल्ली एनसीआरक लेल एकटा केंद्रीय टीम एवं दिल्ली एनसीआरक सभ जिलाक लेल टीमक गठन आ पदाधिकारीक चयन कयल गेल।
अधिवेशनमे पहुँचल संस्थापक अजय नाथ झा शास्त्री अभियानीगणकेँ मिथिलाक्षरक प्रचार-प्रसार लेल उत्साहित कयलनि, अभियानीगण सेहो अभियानक प्रति पुर्ववत् पूर्ण निष्ठा देखाबैत अभियानकेँ गति देबाक लेल कृतसंकल्पित भेलैथ।
शास्त्री कहलनि जे समय-समय पर अपडेट करब आवश्यक होइत छैक आ एहिसँ नव ऊर्जा-उत्साहक संचार होइत छैक आ ताही क्रममे मिथिला एवं देश-विदेशमे पसरल मिथिलाक्षर साक्षरता अभियानीकेँ स्थान अनुसार इकाई (युनिट) केर गठनक क्रममे एहि दिल्ली अधिवेशनमे दिल्ली एनसीआरक ईकाई (युनिट) केर गठन अभियानीगण पूर्ण उत्साहक संग कयलनि। दिल्लीक जिला अनुसार १२ टा टीमक गठन भेल एवं एकटा केंद्रीय टीमक गठन भेल आ अभियानीगण टीमक गठनक उद्येश्यक पूर्तिक लेल मिथिलाक्षर सिखय केर सभठाम प्रेरणा जगेथिन।
शास्त्री आगू कहलनि जे अनुमानक अनुसार लगभग ७० प्रतिशत मिथिलावासी पलायन कयने छथि आ जाहिमे प्रायः ४० प्रतिशत दिल्लीमे छथि, अर्थात दिल्ली मानू एकटा मिनी मिथिले अछि, तऽ हमरा लोकनि दिल्लीक मिथिलावासीकेँ मिथिलाक्षरमय करब, मिथिलाक्षर सिखलाक बाद व्यक्तित्वमे एकटा अलगे निखार आ गौरबबोधसँ स्वाभिमान बढ़ैत छैक, एकदिन दिल्लीसँ उठल ज्योति पुनः मिथिलाकेँ प्रकाशित करत आ मिथिलाक स्थान-मान-सम्मान पुनर्प्रतिष्ठित होयत।
वरिष्ठ अभियानीगण राघव मिश्र, पंकज कुमार कर्ण, शंभु नाथ झा, देवेन्द्र झा, नरेश दास, रंजना झा, राजेश ठाकुर, मिथिलेश झा, रविन्द्र राय, संगीता कर्ण आदि अपन-अपन अनुभव व्यक्त कयलनि आ आगुक दिशानिर्देशक रुपरेखा तय करयमे मुख्य भूमिका निभेलनि आ जकरा उपस्थित अभियानी लोकनि रुचिपूर्वक ग्रहण कयलनि एवं तदनुसार गतिविधि करय केर उत्साहपूर्वक सहमति प्रदान कयलनि।
अधिवेशनमे दिल्ली एनसीआर क्षेत्रक अभियानी गण अधिकाधिक संख्यामे भाग लेलन्हि।
बैसारक मुख्य उद्देश्य मिथिलाक्षर लिपिकेँ कोना दिल्ली आ एनसीआर क्षेत्रमे रहनिहार हर एक व्यक्तिसॅं सम्पर्क स्थापित कय हुनका मिथिलाक्षर सिखबाक लेल प्रेरित कय मिथिलाक्षर साक्षरता अभियानक मुख्य समूहमे जोड़ि मिथिलाक्षर सिखायब छल।
मिथिलाक्षरकें अपना दैनिक उपयोगमे लाएब,जेना दुकानसॅं राशनक लिस्ट,वा सब्जीक लिस्ट वा कोनो अन्य तरहक मिथिलाक्षरमे लिखय पर जोर देल गेल।
विशेष पोथीक मिथिलाक्षरमे लिप्यंतरण करबा पर सेहो चर्चा भेल। मिथिलाक्षर स्थापना दिवसक अवसर पर पाक्षिक समारोहक सफल आयोजनक लेल विचार विमर्श भेल। मिथिलाक्षरक प्रचार लेल दिल्ली एनसीआरमे क्षेत्रक हिसाबसॅं समूहक गठन भेल।
वस्तुतः दिल्लीक जिला अनुसार क्षेत्रीय टीमक गठनक एकटा रुप-रेखा तैयार भेल आ जाहिमे १२ टा क्षेत्रीय टीमक गठनक प्रस्ताव पारित भेल एवं जाहि क्षेत्रसँ अभियानी अधिवेशनमे उपस्थित छलथि ताहि क्षेत्रक अधिवेशनेमे पदक जिम्मेदारी केर चयन भेल एवं बाकी क्षेत्रक चयन आगुक बैसारक माध्यमसँ होयत, तकर निर्णय लेल गेल। एहि अनुसार :-
उत्तर पूर्व दिल्लीसँ राधा रमण सिंह (संयोजक), उत्तर पश्चिम दिल्लीसँ राघव मिश्र (संयोजक), पूर्वी दिल्लीसँ रंजना झा (संयोजिका),
राजेश ठाकुर (संयोजक) आ सुधीर यादव (सहसंयोजक) केर रुपमे चयनित भेलथि।
तहिना दक्षिण दिल्लीसँ रविन्द्र कुमार राय (संयोजक), संजय झा दैवली (सह संयोजक), दक्षिण पूर्वी दिल्लीसँ शंभु नाथ झा (संयोजक), दक्षिण पश्चिम दिल्लीसँ पंकज कुमार कर्ण (संयोजक), साकेत कुमार (सहसंयोजक) आ एन०सी०आर० क्षेत्रसॅं
दिल्ली एवं दिल्ली एनसीआरक लेल एकटा ९ सदस्यीय केंद्रीय टीम (सेन्ट्रल टीम) केर गठन भेल आ तत्काल नओ सदस्यकेँ केंद्रीय संयोजकक दायित्व देल गेलनि, जाहिमे :- राघव मिश्र, पंकज कुमार कर्ण, शंभु नाथ झा, देवेन्द्र झा, नरेश दास, राजेश ठाकुर, मिथिलेश झा, रविन्द्र राय आ रंजना झा चयनित भेलथि। राजेश ठाकुरकेँ मिडिया प्रभारी बनाओल गेल।
जनतबक अनुसार अधिवेशनमे अजय नाथ झा शास्त्री सहित राघव मिश्र , पंकज कुमार कर्ण, शंभु नाथ झा, देवेन्द्र झा , नरेश दास, रविन्द्र कुमार राय, राधा रमण मिश्र, ललित कुमार राय, अश्विनी कुमार, साकेत कुमार, अर्चना झा, संगीता कर्ण, रंजना झा, सुधीर यादव, राजेश ठाकुर, सुमित कुमार झा, मिथिलेश कुमार झा, जगतानन्द झा, रोहन कुमार ठाकुर, संजय झा आदि उपस्थित छलथि।
मिथिलाक्षर साक्षरता अभियानक दिल्ली अधिवेशन भेल सफलतापूर्वक संपन्न