पटनाक सखी बहिनपा मैथिलानी समूह मनेलनि १०म वर्षगांठ

सखी बहिनपा समूहक दसम वर्षगांठ छल २४ अगस्त २०२५ केँ – अपन भाषा-संस्कृतिक संरक्षण आ समूहक निरंतरताक लेल गेल संकल्प

पटना समदिया

मिथिलाक महिला शक्ति केर देश विदेशमे संगठित करवामें अग्रणी भूमिका निभेनिहार मैथिलानिक संस्था—’सखी बहिनपा मैथिलानी समूह‘ अपन स्थापना केर १०म वर्षगांठ सामाजिक जिम्मेदारी आ सांस्कृतिक गतिविधि सभक संग मनाओलक। पटना इकाईक सखी सभ सेहो मनेलनि उल्लासपूर्वक एहि दिवसकेँ। सदस्या सभ कहलनि जे ई अवसर समूहक एक दशकक निरंतर सेवाक आ सांस्कृतिक संरक्षण यात्राक प्रतीक छल।

एतय समूहक सदस्या लोकनि अनाथ आश्रमक बच्चा सभक संग खिलखिलाहटक संग, संगहि बौद्धिक दिव्यांग बच्चा सभक संग मिलि कय केक काटलनि आ अपन यात्राक अनुभव हुनका सभकेँ कहलनि। भोजनक व्यवस्था सेहो छल।

समूहकें एहि अवसर पर बच्चा सभककेँ तौलिया, बिस्कुट, क्लिप, हेयर बैंड, चाॅकलेट, बैलून, स्कूल बैग, ड्राइंग बुक, रंगीन पेंसिल, स्केच बुक आ अन्य शैक्षिक सामग्री उपहारमे देल गेल।

सब सखी मिलि कय प्रार्थना कयलीह जे समूह अनंत काल तक बनल रहे आ अपन भाषा एवं संस्कृतिक संरक्षण करैत रही । सब सखी बहुत उत्साहित भ‌ऽ वार्षिकोत्सव मनेलीह। नेहा झा, मोनी झा भावना झा सहित पटना इकाईक सब सखी सम्मिलित भेलीह।

ई संदेश देल गेल जे महिला शक्ति जखनि समाज, संस्कृति आ सेवाक लेल एकजुट होइत अछि, तखन नै मात्र अपन पहिचानकेँ मजबूत करैत अछि अपितु समाजमे सकारात्मक ऊर्जा सेहो पसारैत अछि।