बेतिया जीएमसीएचसँ मानवताकेँ शर्मसार करय वला तस्वीर आयल तँ हंगामा भऽ रहल अछि। असलमे पिछला सोमदिन (11 अगस्त 2025) अस्पतालक किछु कर्मचारी एकटा व्यक्तिक लाशकेँ सीढ़ी पर घसीटैत देखल गेल छल। शवकेँ पोस्टमार्टम घर लऽ जेबाक छल। एहि दौरान अस्पतालमे मौजूद लोक एकटा वीडियो बनौलनि जे वायरल भऽ रहल अछि। अस्पताल व्यवस्था पर सवाल उठि रहल अछि।
बताओल जा रहल अछि जे नौतन रोड स्थित पालम सिटीक समीप एकटा अज्ञात व्यक्तिक लाश बरामद कयल गेल अछि। ग्रामीणक सूचना पर पुलिस मौका पर पहुंच गेल। एकर बाद लाश जीएमसीएच भेजल गेल। एहि दौरान जखनि लाश घसीटबाक वीडियो सामने आयल तँ सब कियो आश्चर्यचकित भऽ गेल। देखय पड़त जे एहि घटना पर वरिष्ठ अधिकारी आओर की कारवाई करैत छथि।
दोसर दिसि जिला प्रशासनसँ लऽ कय अस्पताल प्रशासन धरि एहि मामिलामे कियो किछु कहबा लेल तैयार नहि अछि। एहि मामिलामे जखनि जिला प्रभारी मंत्री जनक चमारसँ गप भेल तँ ओ कहलनि जे हमरा एहि बातक जनतब नहि अछि। हम संबंधित अधिकारीसँ जानकारी लऽ रहल छी जे इ घटना कतय आ कोना भेल।
एहि घटनाकेँ सोझाँ अयलाक बाद बिहार कांग्रेसक नेता राजेश राठौर सरकार पर हमला कयलनि। ओ कहलनि जे, बिहारमे बहार अछि, नीतीश सरकार अछि, मृतकक हालत यैह अछि, एकटा मृतक सीढ़ी पर घसीटल जा रहल अछि आ मानवताक गला दबा देल जा रहल अछि। आम आदमी पार्टी एक्स पर वीडियो शेयर करैत कहलक, “सरकारकेँ लाज होयबाक चाही, बिहारक बेतियामे पोस्टमार्टमक बाद एकटा अनजान मृत शरीरकेँ घसीट कय लऽ जायल गेल। बिहार सरकार मानवताक प्रति कतेक संवेदनशील अछि, चाहे ओ जीवित होय वा मृत, एहि भयावह तस्वीरसँ साफ बुझल जा सकैत अछि।”
