पाकिस्तानी सेना प्रमुख असीम मुनीरक टिप्पणी पर भारत घोर नाराजगी जतैलक अछि। असीम मुनीरक आलोचना करैत विदेश मंत्रालय कहलक कि पाकिस्तानी सेना प्रमुखक कथित तौर पर अमेरिका यात्राक दौरान कयल गेल टिप्पणी पर हमर ध्यान आकर्षित कयल गेल अछि। परमाणु हथियारक धमकी पाकिस्तानक आदति अछि। एहि तरहक टिप्पणीमे निहित गैर जिम्मेदारी पर अंतरराष्ट्रीय समुदाय अपन निष्कर्ष निकालि सकैत अछि। मुनीरक ई बयान एकटा ऐहन देशमे परमाणु कमान आ नियंत्रणक अखंडता पर भारी संदेह दिसि इशारा करैत अछि, जतय सेना आतंकी समूहक संग मिलल अछि। ईहो अफसोसक बात अछि जे ई टिप्पणी मित्र देशक माटिसँ कयल गेल अछि। भारत पहिनेसँ साफ कय देने अछि जे ओ परमाणु ब्लैकमेलक सामने झुकत नहि। हम अपन राष्ट्रीय सुरक्षाक लेल सब आवश्यक डेग उठाबैत रहब।
एहिसँ पहिने भारत सरकारक सूत्रक कहब छल जे, ‘ई साफ अछि जे पाकिस्तान परमाणु हथियारक मामिलामे गैर जिम्मेदार देश अछि। पाकिस्तानक परमाणु हथियार गैर-सरकारी तत्वक हाथमे पड़य केर वास्तविक खतरा अछि। पाकिस्तानी सेना प्रमुखक बयान एकटा चलनक हिस्सा अछि। अर्थात जखनि कखनो अमेरिका पाकिस्तानी सेनाक समर्थन करैत अछि तँ ओ सभ सदिखन अपन असली रंग देखाबैत अछि। ई संकेत अछि कि पाकिस्तानमे लोकतंत्र नहिं अछि। बल्कि ओकर सेना नियंत्रण राखैत अछि।
एकटा सूत्र कहलक कि अमेरिका केर स्वागत आ सत्कारसँ प्रोत्साहित भऽ अगिला कदम संभवतः पाकिस्तानमे तख्तापलट सेहो भऽ सकैत अछि ताकि फील्ड मार्शल राष्ट्रपति बनि सकय।
एहिसँ पहिने पाकिस्तानक सेना प्रमुख असीम मुनीर भारतकेँ धमकी देने छल। मुनीर कहने छल जे जँ भारत सिन्धु नदीक पानि रोकबाक लेल बाँध बनौलक तँ हमरा सभकेँ मिसाइलक कोनो कमी नहि अछि। हम 10टा मिसाइल चला कए बांधकेँ उड़ा देब। अमेरिकाक दौरा पर गेल मुनीर ई धमकी पाकिस्तानी मूलक व्यापारी अदनान असद द्वारा फ्लोरिडा केर ताम्पामे आयोजित एकटा रात्रिभोज कार्यक्रममे देलक।
