शिबू सोरेनक निधन पर तीन दिनक राजकीय शोक, पैतृक गाममे आई तीन बजे मुखाग्नि

रांची समदिया
*

दिशोम गुरु शिबू सोरेनक काल्हि निधन भऽ गेल। ई जानकारी हुनक पुत्र आ मुख्यमंत्री हेमंत सोरेन ‘एक्स’ पर पोस्ट कय शेयर कयलनि। ओ लिखलनि जे आदरणीय दिशोम गुरुजी हमरा सभकेँ छोड़ि गेलथि। आइ हम शून्य भऽ गेल छी। राज्य सरकार तीन दिनक राजकीय शोकक घोषणा कयलक अछि।

शिबू सोरेनक निधनक खबरिकेँ कारण झारखंडमे शोकक लहरि उठल अछि। शिबू सोरेन बहुत दिन धरि बीमार छलाह। दिल्लीक गंगा राम अस्पतालमे हुनकर इलाज भऽ रहल छल। हुनक शव झारखंड अनबाक तैयारी चलि रहल छल। शिबू सोरेनक जन्म 1942मे भेल छलनि। हुनकर पैतृक गाम रामगढ़क नेमरा गाम अछि।

झारखंडक पूर्व मुख्यमंत्री एवं झारखंड मुक्ति मोर्चाक संस्थापक शिबू सोरेनक शव काल्हि साँझ छह बजे झारखंड आयल। सरकारी सूत्रक अनुसार सोमदिन हुनकर शव पहिने रांचीक मोरहाबादी स्थित हुनकर आवास पर आनल गेल आ मंगलदिन भोरमे एकरा झामुमो पार्टी कार्यालयमे अंतिम दर्शन लेल राखल जाएत। एकर बाद शवकेँ झारखंड विधानसभामे आनल जाएत, जतय जनप्रतिनिधि आ अधिकारी हुनका श्रद्धांजलि देताह। अंतिम संस्कार रामगढ़ जिलाक हुनकर पैतृक गाम नेमरामे आई होयत।

राज्यसभाक कार्यवाही शुरू होबयसँ पहिने शिबू सोरेनकेँ श्रद्धांजलि देल गेल। झारखंडक पूर्व मुख्यमंत्रीक लेल उच्च सदनमे मौन धारण कय श्रद्धांजलि देल गेल।

राष्ट्रपति द्रौपदी मुर्मू, प्रधानमंत्री नरेन्द्र मोदी, गृहमंत्री अमित शाह सहित बहुत रास दिग्गज शिबू सोरेनक निधन पर शोक व्यक्त कयलनि। पीएम मोदी झारखंडक मुख्यमंत्री हेमंत सोरेनसँ बात सेहो कयलनि।

प्रधानमंत्री ट्वीट कय कहलनि, “शिबू सोरेन जी एकटा जमीनी स्तरक नेता छलथि। ओ जनताक प्रति अटूट समर्पणक संग सार्वजनिक जीवनमे तरक्की कयलनि। आदिवासी समुदायक गरीब आ विपन्न लोककेँ सशक्त बनाबै लेल विशेष रूपसँ प्रतिबद्ध छलथि। हुनक निधनसँ दुखी छी। हमर संवेदना हुनक परिवार आ प्रशंसकक संग अछि।”

शिबू सोरेनक मृत्युक जानकारी भेटला पर प्रधानमंत्री नरेंद्र मोदी दिल्लीक सर गंगा राम अस्पताल पहुंचलाह। पीएम मोदी झारखंडक पूर्व मुख्यमंत्रीक परिवारक सदस्यकेँ सांत्वना देलनि आओर दिवंगत सांसदकेँ श्रद्धांजलि देलनि।

मुख्यमंत्री नीतीश कुमार झारखंडसँ अपन पूर्व समकक्षकेँ भावुक श्रद्धांजलि दैत पड़ोसी राज्यक राजनीतिमे हुनकर महत्वपूर्ण योगदानकेँ याद कयलनि। ओ ‘एक्स’ पर लिखलनि जे “झारखंडक राजनीतिमे हुनक महत्वपूर्ण योगदान यादगार अछि। हुनक निधनसँ खाली झारखंड केर नहिं बल्कि पूरा देश केर राजनीतिक आ सामाजिक क्षेत्र केर अपूरणीय क्षति भेल अछि। हम भगवानसँ प्रार्थना करैत छी जे दिवंगत आत्माक शांति भेटय आ हुनक परिवार आ प्रशंसककेँ ई शोक क्षणमे धैर्य सहबाक लेल शक्ति भेटय।”