उत्तराखंडमे हरिद्वारक मानसा देवी मंदिर मार्ग पर भगदड़क कारण काल्हि एकटा पैघ दुर्घटना भेल। भगदड़मे आठ गोटेक मृत्युक खबरि अछि। बहुतो लोककेँ गंभीर रूपसँ घायल होबय केर खबरि सेहो अछि। मौका पर राहत आ बचाव कार्य चलि रहल अछि। दुर्घटनाक बाद पुलिस आ प्रशासनक टीम तुरंत घायलकेँ अस्पताल लऽ जेबाक काज शुरू कय देलक। संगहि मुख्यमंत्री पुष्कर सिंह धामी मृतक आ घायलक परिवारकेँ मुआवजा देबाक घोषणा कयलनि। एकर संगहि हेल्पलाइन नंबर सेहो जारी कएल गेल अछि।
सीएम पुष्कर सिंह धामी करीब दू बजे हरिद्वार पहुंचलाह आ अस्पतालमे घायलक हालत केर बारेमे पूछताछ कयलनि।
जनतबक अनुसार रविदिन भोर करीब नौ बजे मंदिर चढ़ाई करय वला भक्तक बीच कियो बिजली करंटक अफवाह पसारि देलक, जाहि कारण भक्तक बीच भगदड़ मचि गेल। अफरा-तफरीमे लोक एक दोसरा पर खसि पड़ल। चीख-पुकारक बीच कतेको भक्त एही भगदड़मे दबि गेलथि।
सूचना भेटैत देरी पुलिस आ प्रशासनिक टीम मौका पर पहुंचल आ राहत आ बचाव काज शुरू भऽ गेल। घायलकेँ नजदीकी अस्पतालमे भर्ती कराओल गेल अछि। स्थिति काबूमे अछि, मुदा दुर्घटनाक कारण इलाकामे दहशतक माहौल अछि।
गढ़वालक मंडल आयुक्त विनय शंकर पांडेय समाचार एजेंसीकेँ कहलनि जे, हरिद्वारक मानसा देवी मंदिरमे भारी भीड़ जमा भेलाक बाद भगदड़ मचि गेल। भगदड़मे 8 गोटेक मौत भऽ गेल। बहुतो लोक घायल सेहो भेल अछि।
एम्सक प्रो संदीप कुमार कहलनि जे, कुल 15 घायलकेँ एम्स आनल गेल, जाहिमे सँ पांच गोटेक प्राथमिक चिकित्साक बाद छुट्टी दऽ देल गेल अछि। 10 गोटे एखनो एतय भर्ती छथि। एहिमे दू वर्षीय लड़की, 26 वर्षीय महिला आ 56 वर्षीय महिलाक हालत गंभीर बनल अछि।
एसएसपी प्रमोद सिंह डोबाल कहलनि जे, दुर्घटनामे घायल कुल 35 श्रद्धालुकेँ जिला अस्पताल आनल गेल अछि, जाहिमे भगदड़मे 8 श्रद्धालुक मौत भऽ गेल अछि तँ किछु घायल भऽ गेल अछि। जाहिमे गंभीर हालतक मरीजकेँ हायर सेंटरमे रेफर कयल जा रहल अछि।
भगदड़क घटनामे घायलक तत्काल प्राथमिक चिकित्सा आ सुरक्षित अस्पताल पहुंचेबाक लेल 108 सेवाक सातटा एम्बुलेंसकेँ मौका पर तैनात कयल गेल। एहि एम्बुलेंस सेवाक माध्यमसँ बहुतो घायलकेँ समय पर अस्पताल पहुंचाओल गेल आओर जरूरी चिकित्सा सहायता देल गेल।
मुख्यमंत्री पुष्कर सिंह धामी शोक व्यक्त करैत कहलनि, हरिद्वारक मानसा देवी मंदिर मार्ग पर भगदड़क बहुत दुखद खबरि भेटल अछि। एसडीआरएफ, स्थानीय पुलिस आ अन्य बचाव दल मौका पर पहुँचि राहत आ बचाव कार्यमे लागल अछि। एहि संबंधमे स्थानीय प्रशासनसँ लगातार संपर्कमे छी आ स्थिति पर लगातार नजरि राखल जा रहल अछि। सब भक्तक सुरक्षाक लेल माता रानीसँ प्रार्थना करैत छी।
