प्रधानमंत्री नरेंद्र मोदी अपन तमिलनाडु यात्रा पर कहलनि कि आजुक भारत अपन सुरक्षाकेँ सर्वोपरि मानैत अछि। ऑपरेशन सिंदूरक दौरान दुनिया देखलक जे जँ कियो भारतक सुरक्षा आ संप्रभुता पर हमला करैत अछि तँ भारतकेँ पता अछि जे ओकर जवाब अपन भाषामे कोना देल जाय। एहि अभियानसँ ई बात साफ भऽ गेल अछि कि आब दुनियाक कोनो जगह भारतक दुश्मन आ आतंकवादी लेल सुरक्षित नहि अछि।
ओ कहलनि, जखनि हम हेलीपैडसँ एतय आयल छलहुं तँ तीन-चारि किलोमीटरक दूरी अचानक रोड शोमे बदलि गेल आ सब कियो ऑपरेशन सिंदूरक प्रशंसा कय रहल छल। ऑपरेशन सिंदूर पूरा देशमे एकटा नव जागरण आ नव आत्मविश्वास पैदा कयलक अछि। दुनियाकेँ भारतक ताकतक एहसास होयबाक चाही।
पीएम मोदी कहलनि, चोल कालमे भारत द्वारा प्राप्त आर्थिक आ सैन्य ऊंचाई आइयो हमरा सभकेँ प्रेरित करैत अछि। प्राचीन भारतक राजा सभक दूरदर्शिताकेँ रेखांकित करैत ओ कहलनि जे राजाराज चोल एकटा शक्तिशाली नौसेनाक निर्माण कयलनि, जकरा राजेन्द्र चोल आओर मजबूत कयलनि।
पीएम मोदी कहलनि जे चोल साम्राज्य विकसित भारतक लेल एकटा प्राचीन रोडमैप जकाँ अछि। ई बताबैत अछि कि जँ हमरा सभकेँ ‘विकसित भारत’ बनाबय केर अछि तँ हमरा सबकेँ अपन नौसेना, रक्षा बलकेँ मजबूतीक नव अवसर खोजय केर अछि।
प्रधानमंत्री कहलनि, हमरा खुशी अछि जे आई एक बेर फेर काशीसँ गंगाजलकेँ एतय आनल गेल अछि। ओ कहलनि जे हम काशीक जनप्रतिनिधि छी आ माँ गंगासँ हमर विशेष संबंध अछि। प्रधानमंत्री कहलनि कि चोल राजा केर काज आ हुनकासँ जुड़ल ऐतिहासिक घटनासँ एक भारत केर महायज्ञ श्रेष्ठ भारतकेँ ऊर्जा, नव शक्ति आ नव उत्साह भेटैत अछि। ओ चोल सम्राट लोकनिक विरासतकेँ भारतक एकता आ सांस्कृतिक गौरवक प्रतीक बतौलनि ।
एहिसँ पहिने प्रधानमंत्री नरेंद्र मोदी तमिलनाडुक प्रसिद्ध बृहदेश्वर मंदिरक दौरा कय प्रार्थना कयलनि। ओ कहलनि जे हमरा भगवान् बृहदेश्वरक चरणमे पूजा करबाक सौभाग्य भेटल। हम 140 करोड़ देशवासीक भलाई आ भारतक निरंतर प्रगतिक लेल प्रार्थना कयलहुं अछि। कामना अछि जे सब गोटेकेँ भगवान शिवक आशीर्वाद भेटय। ई मंदिर चोल वंश केर वास्तुकला केर अद्भुत उदाहरण अछि।
