सुपौलक राघोपुरमे जन सूराज पार्टीक जनसभामे प्रशांत किशोर बिहारक राजनीति पर हमला कयलनि। शराब आ बालू माफियाकेँ मददिसँ जीत हासिल करय वला पर सवाल उठेलनि।
राघोपुरमे शुक्र (25 जुलाई) केँ जन सूराज पार्टीक बिहार बादलाव जनसभाक आयोजित कयल गेल। ओहिमे भारी संख्यामे लोक जमा भेल। कार्यक्रमकेँ संबोधित करैत प्रशांत किशोर राज्यक राजनीति आ हालमे विधानसभाक हंगामा पर तीक्ष्ण प्रतिक्रिया देलनि।
प्रशांत किशोर कहलनि जे आइ बिहारक राजनीति एहेन स्थितिमे पहुंचि गेल अछि जे शराब आ बालू माफियाक मददिसँ जीतयवला लोक विधानसभामे पहुंचि रहल अछि। ओ कहलनि जे, जिनका नहि भाषाक ज्ञान छनि आ नहि लोकतंत्रक समझि छनि, आइ सदनमे बैसि जनताक आवाज दबा रहल छथि।
ओ सत्ताधारी दल आ विपक्ष दुनू पर सवाल उठबैत कहलनि जे जनता द्वारा चुनल गेल जनताक समस्या उठेबाक बदला आपसी विवाद आ अराजकतामे उलझि जाइत अछि। ओ कहलनि जे, सत्ताधारी दल होय वा विपक्ष, जनता दुनू गोटेकेँ अपन प्रतिनिधिक रूपमे पठौने अछि, मुदा ओकरा जनताक कोनो चिंता नहि अछि।
प्रशांत किशोर ईहो कहलनि कि जन सूराज पार्टी केर उद्देश्य ऐहन बिखरल आ संवेदनहीन व्यवस्थाकेँ बदलनाई अछि। ओ कहलनि जे, जा धरि ईमानदार आ जागरूक लोक राजनीतिमे नहि आओत ता धरि व्यवस्थामे सुधारक आशा करब व्यर्थ अछि।
स्थानीय ग्रामीण सेहो एहि बैसारमे भारी संख्यामे भाग लेलनि आ प्रशांत किशोरक बातक समर्थन कयलनि। ई जन सूराज पार्टीक बैसार क्षेत्रमे राजनीतिक चेतना जागृत करबाक दिशामे एकटा महत्वपूर्ण प्रयास मानल जा रहल अछि।
सुपौलमे प्रशांत किशोर विधानसभा घेराबंदी मामिलामे प्राथमिकी पर कहलनि जँ गरीब जनता लेल आवाज उठेबा पर प्राथमिकी दर्ज होइत अछि तँ एकटा केर जगह 10 प्राथमिकी दर्ज होय तखनो कोनो चिंता नहि।
प्रशांत किशोर विधानसभामे भेल झगड़ा पर नेता सबकेँ घेरलनि आ कहलनि, “जखनि शराब आ बालू माफिया विधानसभामे बैसत तखनि मारपीट होयत, कोनो संवाद नहि होयत।”
तेजस्वी यादवकेँ विधानसभा चुनावक बहिष्कारक बयान पर प्रशांत किशोर कहलनि जे तेजस्वी किएक धमकी दऽ रहल छथि, चुनावकेँ बहिष्कार कय देखाउ।
