लोकसभामे विपक्षक नेता आ कांग्रेस सांसद राहुल गांधी शुक्रदिन दिल्लीक तालकटोरा स्टेडियममे ‘भागीदारी न्याय सम्मेलन’केँ संबोधित करैत एकटा पैघ बयान देलनि। ओबीसी वर्गक हितक प्रति अपन प्रतिबद्धता दोहरौलनि, मुदा इहो स्वीकार कयलनि जे जेना हुनका आ कांग्रेसकेँ एहि वर्गक हितक रक्षा करय चाहैत छल, ओ काज ओहि तरहें नहि भेल। ओ कहलनि जे आब ओ ओबीसीक मुद्दाकेँ गहींरसँ बुझैत छथि आ हुनकर हित सुनिश्चित करबा लेल काज करताह।
कार्यक्रमकेँ संबोधित करैत राहुल गांधी कहलनि जे हम 2004 सँ राजनीतिमे छी आ हमरा लेल इ 21 साल भऽ गेल अछि, जखन हम पाछू घुमि कय देखैत छी आ अपन आत्मनिरीक्षण करैत छी तँ हम सही काज कतय केलहुं आ कतय कम पड़लहुं, तखनि दू-तीनटा पैघ मुद्दा देखबामे आबि रहल अछि, जेना जमीन अधिग्रहण बिल, मनरेगा, भोजनक अधिकार, ट्राइबल बिल, नियामगिरी केर लेल लड़ाई, हम इ सबटा काज सही करलहुं, जतय धरि आदिवासी, दलित, महिलाकेँ मुद्दा अछि, हमरा ओतय नीक नंबर भेटबाक चाही।”
ओ आगू कहलनि जे जौं हम कनी पाछू घुमि कय देखय छी तँ एकटा बात बहुत स्पष्ट अछि जे हमरा एकटा विषयमे कमी छल। कांग्रेस पार्टी आ हमरा काजमे कमी छल, ओबीसी वर्गक ओहि तरहें रक्षा नहि कयलहुं जेना हमरा करबाक चाहैत छल। एकर कारण ई छल कि हम ओहि समयमे ओबीसी केर मुद्दाकेँ गहराईसँ नै समझै छलियै। हम मंचसँ कहैत छी जे 10-15 साल पहिने दलितकेँ जे दिक्कत होइत छल ओकरा हम बहुत नीकसँ बुझैत छलहुं। हुनका लोकनिक मुद्दा सामने अछि, सहजहि बुझल जा सकैत अछि, मुदा ओबीसीक समस्या नुकायल रहैत अछि। जँ ओहि समय अहाँक मुद्दा आ समस्याक जानकारी रहैत तँ ओहि समयमे जाति जनगणना स्वयं करा दितौंह। हमर गलती अछि, जकरा हम सुधारय जा रहल छी। ओना एक तरहेँ नीक छल , कारण जँ ओहि समयमे जाति जनगणना करा दितौंह तँ आइ जकाँ नहि होइत।
तेलंगाना केर जाति जनगणनाक आंकड़ाक हवाला दैत राहुल गांधी कहलनि जे 21म सदी आंकड़ा केर सदी अछि। तेलंगानामे सरकारक हाथमे जे आंकड़ा आयल अछि ओहिसँ पता चलत जे राज्यमे सभ कॉरपोरेट आओर हुनक प्रबंधनमे कतेक एससी, एसटी आओर ओबीसी लोक छथि। हमरा सब लग आंकड़ा अछि आ ओहिसँ पता चलैत अछि जे तेलंगानामे अनुसूचित जाति, अनुसूचित जनजाति, ओबीसीकेँ लाखों करोड़क पैकेज नहि भेट रहल अछि। दोसर दिसि मनरेगा, गिग वर्करक लिस्ट निकालि लेब तँ सब लोक एससी, एसटी, ओबीसी कैटेगरी केर छथि।
‘भागीदारी न्याय सम्मेलन’केँ संबोधित करैत राहुल गांधी कहलनि कि देशमे दलित, पिछड़ा, आदिवासी, अल्पसंख्यक वर्ग केर आबादी लगभग 90 प्रतिशत अछि। मुदा बजट बनलाक बाद जखनि हलूवा बांटल जा रहल छल तखनि 90 प्रतिशत आबादीमे सँ कियो नहि छल। देशक 90 प्रतिशत आबादी प्रोडक्टिव फ़ोर्स अछि। अहाँ सभ हलूवा बनबैत छी, मुदा ओ सभ हलूवा खा रहल छथि। हम ई नहि कहि रहल छी जे हलूवा नहि खाउ, मुदा कमसँ कम अहाँकेँ सेहो भेटबाक चाही।
