केंद्रीय संसदीय मामिलाक मंत्री किरेन रिजिजू संसदक मानसून सत्रमे विपक्षी दल द्वारा जारी हंगामाकेँ कड़गर आलोचना कयलनि। ओ विपक्ष पर आरोप लगैलनि कि ओ “कर केर पैसा बर्बाद कय रहल अछि” आ चालू सत्रक दौरान जानिबूझि कय सदन केर कार्यवाही बाधित कय रहल अछि।
किरेन रिजिजू मंगलदिन लोकसभामे कहलनि जे बैसारमे फैसला भेल जे पहिने ‘ऑपरेशन सिंदूर’ पर चर्चा होयत। एकरा लेल समय सेहो तय कएल गेल अछि। सब मुद्दा पर एक संग चर्चा कोना संभव अछि ? मुदा सहयोगक बदला तख्ता लऽ कऽ आबि सदनक कार्यवाहीमे बाधा पहुंचा देलनि। नियमक खिलाफ प्लेकार्ड लऽ कय हमेशा विरोध कयल जाइत अछि, ई निंदनीय अछि। जखनि कि बिजनेस एडवाइजरी कमेटीमे फैसला भेल छल जे सदनमे पोस्टर आ बैनर नहि आनल जाएत।
ओ आगू कहलनि जे, “पोस्टर आ बैनरसॅं सदनकें बाधित करब आपत्तिजनक अछि। ओ सब (विपक्ष) चर्चाक मांग कय रहल छथि आ हम सब एकरा लेल तैयार छी। तखन ओ सब सदनकें कियैक नहि चलय दऽ रहल छथि ? ई दोहरी मानक गलत अछि। अगर अहां चर्चा चाहैत छी तॅं फेर हंगामा नहि करू। सरकार बेर-बेर कहने अछि जे हम सब चर्चाक लेल तैयार छी। मुदा ओ सब हंगामा किएक कय रहल छथि, एकर जिम्मेदारी के लेत।”
संसदक मानसून सत्र दोसर दिन सेहो हंगामाक शिकार भऽ गेल। विपक्षक हंगामाक कारण सदनक कार्यवाही बेर-बेर बाधित भऽ गेल। विपक्ष बिहारमे मतदाता सूचीक विशेष गहन संशोधन (एसआईआर), पहलगाम हमला आ उपराष्ट्रपति जगदीप धनखड़क इस्तीफाक मुद्दा पर चर्चाक मांग कयलक आ भारी नाराबाजी भेल। जकर बाद हंगामाक कारण सदन भरि दिन स्थगित भऽ गेल।
