बिहारमे विधानसभाक मानसून सत्र शुरू भेलासॅं सत्ताधारी दल आ विपक्ष विभिन्न मुद्दा पर आमने-सामने अछि। कानून व्यवस्थाक मुद्दा पर राज्य सरकारकें घेरय केर लेल राजदक कतेको नेता कारी कपड़ा पहिरने विधानसभा पहुंचलनि। जाहि पर जदयूक विधायक चुटकी लैत कहलनि जे एहि लोककेँ कारी कपड़ा पहिरबाक अतिरिक्त मुँह पर सेहो कालिख लेपबाक चाही।
राष्ट्रीय जनता दल (राजद) केर विधायक रणविजय साहू मतदाता संशोधन अभियानक बारेमे कहलनि जे “ई कएलासॅं लोकतंत्रक हत्या भऽ रहल अछि, जे कोनो कीमत पर स्वीकार नहि कयल जा सकैत अछि। महागठबंधन एहि मुद्दा पर नीतीश सरकारक खिलाफ मोर्चा खोलत।”
बिहार पुलिसक ‘ऑपरेशन लंगडा’ पर राजद विधायक कानून व्यवस्थाक मुद्दा पर नीतीश सरकार पर सवाल उठबैत कहलनि जे बिहारमे अपराधीमे कानून व्यवस्थाक कोनो डर नहि अछि। आम लोकक लेल एतय रहब कठिन भऽ गेल अछि। व्यापारी गोपाल खेमकाकें सार्वजनिक रूपसॅं हत्या कय देल गेल। पटनाक पारस अस्पतालमे भर्ती चंदन मिश्रकें गोली मारल जाइत अछि। एहिसॅं साफ पता चलैत अछि जे पूरा बिहारमे गुंडागर्दीक राज अछि। बिहार आतंकक छायामे अछि।
संगे-संग जदयू विधायक विनय चौधरी राजद विधायक पर ‘काला कपड़ा’ पहिरि कानून व्यवस्थाक स्थितिक विरोध करबा पर तंज कयलनि। ओ कहलनि जे, “एहेन लोककें आब अपन चेहरा कारी करबाक चाही, किया कि हुनका राज्यक कानून व्यवस्था पर सवाल उठाबय केर कोनो नैतिक अधिकार नै अछि। जतय धरि कानून व्यवस्थाक बात अछि तॅं हमर सरकार अपराधीक खिलाफ रोज कड़ा कार्यवाही कय रहल अछि आ भविष्यमे सेहो करैत रहत। हम सब अपन राज्यमे कोनो तरहक आपराधिक गतिविधि बर्दाश्त नहि कय सकैत छी। ई बिल्कुल अस्वीकार्य अछि। अपराधीक खिलाफ कार्यवाहीकें दौरान हम सब कोनो तरहक नरम रवैया नहि अपना सकैत छी।”
ओ कहलनि जे हमर सरकार अपराधीक खिलाफ कार्यवाही करबामे एकदम पाछु नहि अछि, हमर पुलिस हालमे आरामे सेहो मुठभेड़ कयलक अछि, जहाँतक राजद शासनक गप अछि तॅं पूरा बिहारकें जानकारी अछि। पूरा बिहारकेँ पता अछि जे राजद शासनमे अपराधी खुलि कए कानून व्यवस्थाक उल्लंघन कोना करैत छल।
जदयू विधायक हरिभूषण ठाकुर राजद विधायक द्वारा कानून व्यवस्थाक संबंधमे विरोध प्रदर्शन पर कहलनि जे एहि लोक लग कोनो मुद्दा नहि अछि। ई लोक आब निराश आ कुंठित भ’ गेल छथि। आगामी चुनावमे बिहारक जनता एहि लोकक चेहरा कारी करत। ‘ऑपरेशन लंगडा’ पर ओ कहलनि जे बिहारमे अपराधीक लेल कोनो जगह नहि अछि। जॅं कोनो अपराधी कोनो गतिविधिमे शामिल पाओल गेल तॅं निश्चित रूपसॅं ओकरा खिलाफ सख्त कार्यवाही कयल जाएत।
