बिहारक राजधानी पटनामे हत्याक घटना नहि रुकि रहल अछि। काल्हि एक बेर फेर एकटा युवकक दिनदहाड़े गोली मारि हत्या कय देल गेल। सोमदिन राजधानी पटनासँ सटल दुल्हिन बाजारमे एकटा युवककेँ गोली मारि हत्या कय देलक। कहल जा रहल अछि जे तीनटा अपराधी एहि अपराधकेँ पेशेवर तरीकासँ अंजाम देलक। तीनू बदमाश सोझे युवकक माथ आ छाती पर गोली चला देलक। गोली लगलासँ हुनक मौका पर मौत भऽ गेल।
घटनाक बाद पूरा इलाकामे दहशत पसरल अछि। घटनाक जनतब भेटैत पुलिस मौका पर पहुंचल आ जांच शुरू कय देलक। हत्याक कारण घर लग 12 कट्ठा जमीनक विवाद बताओल जा रहल अछि। मृतकक पहिचान सदावे गाम निवासी विजय सिंहक 35 वर्षीय बेटा आदित्य कुमारक रूपमे कयल गेल अछि।
युवक पटनामे फौजी आ फैंस सिक्योरिटी गार्ड एजेंसी चलाबैत छल। एकर कार्यालय जक्कनपुर थाना लग छल। शहरक एसपी पश्चिम भानु प्रताप सिंह मौका पर पहुंचि स्थितिक जायजा लेलनि। शूटर आ ओकर साथीक पहिचान भऽ गेल अछि। मौकासँ एकटा बजाज मोटरसाइकिल आ एकटा लोडेड पिस्तौल आ जिन्दा कारतूस बरामद कायल गेल अछि।
एसपी पटना सिटी (पश्चिम) भानु प्रताप सिंह कहलनि जे, “दुल्हिन बाजार थाना अंतर्गत सदावे गाममे तीन गोटे एकटा युवककेँ गोली मारि कय हत्या कय देलक। तीनू आरोपी मौकासँ भागि गेल अछि। आरोपीक पहिचान भऽ गेल अछि। हत्याक कारण जमीनक विवाद अछि। आरोपीकेँ गिरफ्तार करय लेल टीम बनाओल गेल अछि आ छापामारी भ रहल अछि।”
