भारत-नेपाल सीमा दू दिनक लेल सील कएल गेल अछि । एहि दौरान निजी आ व्यावसायिक वाहन नहि चलत। एकर संग-संग आम लोकक आवागमन पर सेहो रोक लगा देल जायत। पूरा इलाकामे सतर्कता बढ़ल अछि। असलमे प्रधानमंत्री नरेंद्र मोदी मोतिहारी आबि रहल छथि। ओ शहरक गांधी मैदानमे एकटा पैघ जनसभा केर संबोधित करताह। एकर संगहि रोड शो सेहो होयत। एहेन स्थितिमे हुनकर कार्यक्रमके लs कs सतर्कता बढ़ल अछि।
भारत-नेपाल सीमा सील भs गेल अछि, जे आई धरि रहत। ओना पीएम मोदी मोतिहारी छोड़लाक बाद स्थिति पहिने जेकां सामान्य भs जायत। जनतबक अनुसार सीमा पार केर अनुमति केवल विशेष परिस्थितिमे पहिचान पत्र देखा कs देल जायत। एम्हर सुरक्षा एजेंसी लगातार सीमा पर नजरि राखि रहल अछि। एकर संग-संग हर इंच पर नजरि राखल जा रहल अछि। एटीएस आ स्पेशल ब्रांच यूनिटकेँ सेहो बजाओल गेल अछि। एकर संगहि एसपीजी आ पुलिस केर शीर्ष अधिकारी मोतिहारी पहुँचि गेल छथि। आबय-जाय वाला लोककेँ नीकसँ जांच कएल जा रहल अछि.
एकर अलावा 17 जुलाई पीएम मोदी केर कार्यक्रम लेल मॉक ड्रिल कयल गेल। जिलाक सब थानाकेँ अलर्ट कs देल गेल अछि। एसपीजी कार्यक्रम स्थल गांधी मैदान सहित दू किलोमीटर क्षेत्र केर सुरक्षा घेरामे राखने अछि। बम निपटान दस्ताक संग डॉग स्क्वॉयडकेँ तरफसँ पूरा इलाकाक निरीक्षण कएल जा रहल अछि। एकर अलावा हेलीपैड, परिसदन आदि पर सैनिकक तैनात कयल गेल अछि। कुल मिला कs पीएम मोदी केर आबयसँ पहिने इलाका केर हर इंच पर नजरि रखल जा रहल अछि । सब अधिकारी अलर्ट मोड पर छथि।
