नीतीश सरकार शिक्षकक बम्पर भर्तीक घोषणा कयलक अछि। एहि नियुक्तिमे महिला लेल 35 प्रतिशत आरक्षणक लाभ केवल ओहि महिलाकेँ देल जाएत जे बिहारक मूल निवासी छथि।
बिहारमे विधानसभा चुनावसॅं ठीक पहिने नीतीश सरकार शिक्षकक बम्पर भर्तीक घोषणा कयलक अछि। सोशल मीडिया प्लेटफॉर्म एक्स पर जानकारी दैत मुख्यमंत्री नीतीश कुमार कहलनि जे हम शिक्षा विभागकेँ निर्देश देलहुँ अछि जे सरकारी स्कूलमे शिक्षकक रिक्ति तुरंत गणना कय टीआरई 4 (शिक्षक भर्ती परीक्षा- 4) परीक्षा आयोजन जल्द कयल जाए।
मुख्यमंत्री कहलनि, एहि नियुक्तिमे महिला लेल 35 प्रतिशत आरक्षणक लाभ मात्र ओहि महिलाकेँ देल जाएत जे बिहारक मूल निवासी छथि। ई घोषणा ऐहन समयमे कयल गेल अछि जखनि आगू किछु महीनामे विधानसभा चुनाव होबय केर अछि। आ एकरा सरकार द्वारा युवा आ खास कय महिला मतदाताकेँ लोभाबय लेल एकटा पैघ पहल मानल जा रहल अछि।
जनतब जे, एहि परीक्षाक माध्यमसॅं बिहारक सरकारी स्कूलमे विभिन्न स्तर पर शिक्षकक नियुक्ति होइत अछि, जाहिमे प्राथमिक (कक्षा 1-5), मिडिल स्कूल (कक्षा 6-8), माध्यमिक (कक्षा 9-10) आ उच्च माध्यमिक (कक्षा 11-12) शामिल अछि।
