बेगूसरायमे दिनमे गोलीबारी, तीन युवकमे एक मृत्यु आ दू घायल

बेगूसराय समदिया
*

सोमदिन बिहारक बेगूसरायमे बदमाश तीन युवककेँ गोलीसँ छलनी कय देलक। एहि हमलामे एकटा युवकक मृत्यु भऽ गेल, जखनिकि दूटाक हालत गंभीर अछि। लोहिया नगर थाना क्षेत्रक बाघा रेलवे क्रासिंगक समीप ई घटना भेल।

मृतकक पहिचान स्थानीय निवासी स्वर्गीय छोटू महतो केर बेटा अमित कुमारक रूपमे कयल गेल अछि। घायल युवकमे सँ एकटाक नाम नंदकिशोर सिन्हाक बेटा राजकुमार कुमार अछि, जखनकि दोसर घायल शुभम कुमार रामदीरी केर निवासी अछि।

जनतब केर अनुसार तीनू युवक रेलवे क्रासिंग लग छोट-छोट गाड़ीसँ बैरियर शुल्क वसूली केर काज करैत छल। सोमदिन सेहो अपन कार्यस्थल पर उपस्थित छल। एम्हर दू टा मोटरसाइकिल पर सवार छह टा नकाबपोश हमलावर ओतय पहुंचि अंधाधुंध फायरिंग शुरू कय देलक।
गोलीक बौछारमे तीनू युवक गंभीर रूपसँ घायल भऽ जमीन पर खसि पड़ल। स्थानीय लोक तत्काल पुलिसकेँ एहि घटनाक सूचना देलक। पुलिस मौका पर पहुंचि घायल युवककेँ सदर अस्पताल लऽ गेल, जतय डॉक्टर अमित कुमारकेँ मृत घोषित कय देलक। एम्हर प्रिंस आ शुभमकेँ इलाज भऽ रहल अछि।

घटनाक बाद इलाकामे अफरा तफरी मचि गेल आ अस्पताल परिसरमे सेहो तनावपूर्ण माहौल देखल गेल। फिलहाल पुलिस मामिलाक जांच कय रहल अछि आओर आरोपीक तलाशमे छापामारी शुरू कय देल गेल अछि। प्रारंभिक जांचमे एकरा आपसी प्रतिद्वंद्विता वा वसूली विवादक मामिला मानल जा रहल अछि।

पुलिस अधिकारी कहलनि जे मामिला वर्चस्वक लड़ाई वा जमीनक विवाद भऽ सकैत अछि। ओ कहलनि जे, अमित कुमारकेँ इलाजक दौरान मृत्यु भऽ गेल आ दोसरक इलाज चलि रहल अछि।
पुलिसक कहब अछि जे परिवारक लोकक कहनाय अछि जे हुनकर अपन समुदाय केर दीपो महतो गोली चलबेलक अछि। दीपो महतो आ छोटू महतो केर बीच झगड़ा चलि रहल अछि। मृतक अमित महतो मात्र किछुए दिन पहिने एकटा मामिलामे जमानत पर जेलसँ बाहर आयल छल।

परिवार कहलक जे किछु लोक बाइकसँ आबि गोलीबारी शुरू कय देलक। मृतकक मां कहलनि जे, हुनकर समाजक लोक हुनकर बेटाक हत्या करा देलक अछि।