बिहारमे चुनावी सालमे एक केर बाद एक पैघ आपराधिक घटना भऽ रहल अछि, जाहिसँ कानून व्यवस्था पर लगातार सवाल उठि रहल अछि।
बिहारक राजधानी पटनामे अपराधीक आतंक जारी अछि। कानून व्यवस्था पर सवाल उठि रहल अछि। खास कऽ व्यवसायी सभकेँ निशाना बनाओल जा रहल अछि।
शुक्रकेँ पटनामे एकटा आओर व्यवसायीक हत्या कऽ देल गेल। ई घटना देर राति पटनाक रामकृष्ण नगर थाना क्षेत्रमे भेल। सूचना भेटलाक बाद पुलिस मौका पर पहुँचल आ मामिलाक जांच कय रहल अछि।
जनतबक अनुसार विक्रम झा नामक दोकानदारकेँ गोली मारल गेल अछि, जाहिसँ हुनक मृत्यु मौके पर भऽ गेल। ओ मिथिला क्षेत्रीय बिहारक दरभंगा निवासी छलाह। विक्रम झा तृष्णा मार्टक मालिक छलाह। बाइक सवार अपराधी घटनाक अंजाम देलक। अपराध कयलाक बाद अपराधी भागि गेल।
घटनाक कारण एखन धरि स्पष्ट नहि अछि। मौका पर पहुंचल पुलिस जांच शुरू कय देलक अछि। सीसीटीवी फुटेज स्कैन कएल जा रहल अछि। परिचय कुमार, नगर पुलिस अधीक्षक (पूर्व), पटना मौका पर पहुंचल छलथि। ओ कहलनि जे, लोक सब कहलक एकटा व्यक्ति बाइक पर आबि गोली मारि कऽ भागि गेल। एकटा व्यक्ति भागैत देखल गेल अछि। एहिमे बेसी लोक शामिल भऽ सकैत अछि। गोली लगलाक बाद विक्रम झाकेँ इलाजक लेल लऽ जा रहल क्रममे रास्तेमे हुनक मृत्यु भऽ गेल।
परिचय कुमार कहलनि जे, दोकान देखला पर लगैत अछि जे डकैतीक कोनो घटना नहि भेल अछि। हम सभ एहि घटनाक पाछुक कारणक पता लगाबय केर कोशिशमे छी। अपराधीकेँ गिरफ्तार करय लेल छापामारी चलि रहल अछि। घटनास्थलसँ गोलीक खोखा बरामद नहि भऽ सकल अछि। एफएसएल टीम बजाओल गेल अछि। शव पोस्टमार्टमक लेल भेजल गेल अछि। स्थानीय थानासँ पता चलल अछि जे एहिसँ पहिने हुनका दिसिसँ कोनो शिकायत नहि दर्ज कएल गेल छल।
जनतब जे बिहारमे ई चुनावी साल अछि। एक केर बाद एक पैघ आपराधिक घटना भऽ रहल अछि। कानून व्यवस्था पर लगातार सवाल उठि रहल अछि। व्यवसायी अपराधीक निशाना पर छथि। बड़का व्यापारी गोपाल खेमकाकेँ घरक गेट पर अपराधी गोली मारि कय हत्या कऽ देलक। एकर बाद बालू व्यापारी रमाकांत यादवकेँ अपराधी गोली मारि हत्या कय देलक। एम्हर आब व्यवसायी विक्रम झा’क हत्या अपराधी द्वारा कयल गेल अछि। अपराधी एकदम निडर देखाइत अछि।
