बिहार चुनावसँ पहिने नीतीश कुमारक सरकार राज्य केर जनताकेँ आर एकटा पैघ उपहार देबाक तैयारीमे अछि। असलमे बिहारमे 100 यूनिट धरि बिजली मुफ्त करबाक योजना पर काज चलि रहल अछि। वित्त विभाग सेहो एहि योजनाके मंजूरी दऽ देलक अछि।
बिहारमे एहि साल विधानसभा चुनाव होबय जा रहल अछि। एहिसँ पहिने सब दल द्वारा तैयारी भऽ रहल अछि। चुनावसँ पहिने नीतीश सरकार जनताकेँ एक पर एक कतेको पैघ उपहार दऽ रहल अछि। एहि क्रममे आब बिहारक जनताकेँ 100 यूनिट धरि मुफ्त बिजली भेटय जा रहल अछि। नीतीश सरकार जल्दिये एहि प्रस्तावकेँ पारित करय जा रहल अछि।
असलमे ऊर्जा विभाग एहि प्रस्तावकेँ तैयार कयलक अछि, जकरा वित्त विभाग सेहो मंजूरी दऽ चुकल अछि। आब मंत्रिमंडलसँ मंजूरी लंबित अछि। मंत्रिमंडलसँ मंजूरी भेटैत एहि योजनाकेँ लागू कयल जाएत।
दरअसल, सामाजिक सुरक्षा पेंशनक राशि बढ़ेलाक बाद आब बिहार सरकार चुनावी सालमे प्रति परिवार 100 यूनिट मुफ्त बिजली देबाक योजना बना रहल अछि। ऊर्जा विभाग अपन प्रस्ताव तैयार कयलक अछि, जाहि पर वित्त विभाग सेहो अपन सहमति दऽ देलक अछि। मंगलदिन मंत्रिमंडलसँ मंजूरीक बाद एहि योजनाकेँ लागू कयल जा सकैत अछि। एहि योजनाक तहत घरेलू उपयोगक लेल प्रति परिवार 100 यूनिट तक बिजली मुफ्त उपलब्ध होएत। उपभोक्ताकेँ तखने भुगतान करय पड़त जखन ओ एहिसँ बेसी बिजलीक उपयोग करत।
सूत्रक अनुसार सरकार कृषि क्षेत्रमे उपभोक्ताकेँ बिजली पर किछु आओर रियायत देबाक योजना पर सेहो विचार कय रहल अछि। बता दी जे फिलहाल बिहारक शहरी इलाकामे बिजली दर 7.57 टका प्रति यूनिट अछि।
