जनशक्तिक धनी पप्पू यादव आ वाकशक्तिक धनी कन्हैया कुमारकेँ राहुल-तेजस्वीवाला गाड़ीमे चढ़य नहिं देबाक घटनाक विडियो वायरल भऽ गेल आ लोक तरह-तरहक गप्प जाहिमे अधिकतर कटाक्षक पोस्ट कऽ रहल छथि।
दरअसल निर्वाचन आयोगक मतदाता संशोधन कार्यक विरोधमे इंडी गठबंधनक वरिष्ठ नेता आ कार्यकर्ता सब बुधकेँ बिहार भरिमे प्रदर्शन कयलनि। पटनामे सेहो विरोध प्रदर्शन भेल। एहीमे कांग्रेस सांसद राहुल गांधी सेहो भाग लेलनि। आयकर गोलंबर पर विरोध मार्चक गाड़ी विपक्षी नेताक लेल सजाओल गेल छल। राहुल गांधी, तेजस्वी यादव, दीपंकर भट्टाचार्य, मुकेश सहनी सहित बहुतो वरिष्ठ नेता एहि पर सवार भेलाह। एहि बीच बिहारक एकमात्र सांसद पप्पू यादव गाड़ी पर चढ़बाक प्रयास कयलनि। मुदा, गाड़ीमे पहिनेसँ मौजूद अंगरक्षक सब हुनका रोकि देलनि। पप्पू यादव फेर कोशिश कयलनि मुदा फेर हुनका रोकल गेल। एहेन भेल जे पप्पू यादव खसयसँ बचि गेलाह। एकर बाद पप्पू यादवक समर्थक अंगरक्षककेँ मनाबय केर कोशिश सेहो कयलनि मुदा कोनो फायदा नहि भेल। एहि तरहें राहुल गांधीसँ पप्पू यादवक भेंटो नहि कऽ सकलाह।
ठिक एहने हाल प्रायः कांग्रेस नेता कन्हैया कुमारक संग सेहो भेल। बताओल जा रहल अछि जे हुनका विरोध मार्चमे जा रहल गाड़ीमे सेहो नहि चढ़य देल गेल। कन्हैया कुमार सेहो गाड़ीमे चढ़बाक प्रयास कयलनि मुदा अंगरक्षक उतारि देलक। एकर बाद ओ गाड़ीक पाछू चलय लगलाह। पत्रकार द्वारा एहि बारेमे पूछला पर ओ कहलनि जे प्रदर्शनक बाद गप करब। दुनू गोटेक ई विडियो वायरल अछि।
पप्पू यादव कांग्रेसक झंडा लऽ कऽ
विरोध करैत देखल गेलाह।
जनतब जे पप्पू यादव लोकसभा चुनावसँ पहिने कांग्रेसमे अपन पार्टीक विलय करबाक घोषणा कयने छलाह। ओ कांग्रेसमे शामिल भऽ गेलाह। मुदा, पूर्णिया लोकसभासँ टिकट नहिं भेटलनि। एकर बाद ओ निर्दलीय केर रूपमे चुनाव लड़बाक निर्णय लेलनि आ ओ जीत सेहो गेलाह। जीतक बाद ओ अपनाके कांग्रेसी बतेलनि। ओ कतेको बेर राहुल गांधी आ प्रियंका गांधीक प्रशंसा करैत देखल गेलाह। ओ कतेको बेर कांग्रेसकेँ सेहो अपन समर्थन देलनि। मुदा, कांग्रेसक शीर्ष अधिकारी वा राहुल गांधी पप्पू यादवकेँ लऽ कऽ कहियो कोनो बयान नहि देलनि।
बुधदिन सेहो पप्पू यादव कांग्रेसक झंडा लऽ कऽ विरोध प्रदर्शन करैत देखल गेलाह। मुदा, हुनका संग कोनो वरिष्ठ कांग्रेसी नेता नहि देखल गेल।
