समाजवादी पार्टीक राष्ट्रीय अध्यक्ष अखिलेश यादव बिहारक सीएम नीतीश कुमारकेँ लऽ कऽ पैघ बयान देलनि। सपा प्रमुख कहलनि जे हम हुनका पीएम बनाबय चाहैत छलहुं।
उत्तर प्रदेशक पूर्व मुख्यमंत्री अखिलेश यादव सोमदिन भारतीय जनता पार्टीक जनता दल संयुक्त (जदयू) केर संग गठबंधनकेँ लऽ कऽ ओकरा पर कटाक्ष कयलनि। कन्नौज सांसद आरोप लगौलनि जे भाजपा बिहारक मुख्यमंत्री नीतीश कुमारक नाम आ चेहराक चुनाव चुनावी फायदाक लेल इस्तेमाल कय रहल अछि, मुदा हुनका फेरसँ मुख्यमंत्री बनेबाक कोनो इरादा नहि अछि।
यादव दावा कयलनि जे, ‘ओ सब (भाजपा) नीतीश कुमारक नाम आ चेहराक प्रयोग कय रहल छथि, मुदा फेर हुनका मुख्यमंत्री नहि बनाओत। हम सब कहियो हुनका प्रधानमंत्री पदक उम्मीदवार बनाबय चाहैत छलहुं, मुदा आब देखू – ओ मुख्यमंत्री पदसँ ‘रिटायर’ भ’ जेताह। भाजपा हुनका रिटायर करय लेल मजबूर करत।
सत्ताधारी भाजपा आ ओकर वैचारिक रुख पर निशाना लगाबैत सपा प्रमुख कहलनि जे, हमरा एकटा बात बुझल अछि – सत्यक मार्ग धर्मक मार्ग थिक, से थिक सत्य सनातन मार्ग। जे अन्याय करैत अछि, भेदभाव करैत अछि आ बच्चा सभक राजनीतिमे उपयोग करैत अछि, ओ अपनाकेँ सनातनी नहि कहि सकैत अछि ।
उत्तर प्रदेशक मुख्यमंत्री योगी आदित्यनाथ पर परोक्ष रूपसँ हमलामे ओ कहलनि जे, आजुक राजनीतिमे सिर्फ ‘केसरिया कपड़ा’ पहिरलासं ‘बाबा’ वा योगी नहि बनैत अछि। सच्चा पहिचान विचार आ व्यवहारसँ भेटैत अछि।
यादव भाजपा पर आरोप लगौलनि जे ओ मूल मुद्दासँ ध्यान हटा रहल अछि। ओ बजलनि, भाजपा सभ मूल समस्या पर चर्चा नहि करय चाहैत छथि । मुदा लोककेँ इंतजार अछि, उत्तर प्रदेशमे 2027 केर चुनाव एहेन होएत जेहेन अहाँ सभ पहिने कहियो नहि देखने होयब।
