केंद्रीय अल्पसंख्यक मामिला मंत्री किरेन रिजिजूक अध्यक्षतामे शुक्रदिन हज समीक्षा बैसार भेल। एहि दौरान हज 2025 केँ सबसँ सफल हज यात्रामेसँ एक कहल गेल। ओ कहलनि जे, हम सब आइसँ हज 2026 केर तैयारी शुरू कय देलहुँ अछि।
केंद्रीय मंत्री किरेन रिजिजू शुक्रदिन मीडियासँ बात करैत कहलनि जे, हम सब आधिकारिक तौर पर आइसँ हज 2026 केर तैयारी शुरू कऽ देलहुँ अछि। हमरा ई कहैत खुशी भऽ रहल अछि जे हज 2025 केर हालक इतिहासमे सबसँ नीक प्रबंधित आ सफल हज यात्रामे सँ एक मानल जा सकैत अछि।
ओ आगू कहलनि जे, “पिछला साल आ ओहिसँ पहिने हज यात्राक दौरान बहुत रास घटना देखल गेल अछि, जाहि केर कारण 64 लोकक मौत भऽ गेल आओर पिछला साल ई आंकड़ा 200 सँ ऊपर छल। एहि बेर जे 64 लोकक मौत भेल अछि ओकर अलग-अलग कारण अछि।”
केंद्रीय मंत्री किरेन रिजिजू इहो कहलनि जे, हज 2026 लेल आवेदन प्रक्रिया एक सप्ताह बाद शुरू भऽ जायत। हम हज पर जाय वाला सब तीर्थयात्रीसँ अपील करब जे समय पर आवेदन जमा करथि।
किरेन रिजिजू कांग्रेसकेँ निशाना बना कहलनि जे, “कांग्रेस पार्टी आ किछु अन्य दल अल्पसंख्यककेँ डराबैत अछि आ हुनका गुमराह करबाक कोशिश करैत अछि। भारतमे अल्पसंख्यककेँ जे सुविधा भेटैत अछि ओ दुनियाक कोनो देशमे उपलब्ध नहि अछि। एकर बावजूद विपक्ष लगातार हमर देशमे राजनीतिक फायदा उठाबय केर कोशिशमे अछि। पिछला 75 सालमे कांग्रेस पार्टी आ अन्य दल जे काज कयलक अछि से अल्पसंख्यक केर वोट बैंक बनेबाक काज कयलक अछि, ओ आब बंद भऽ जेबाक चाही। मुसलमानकेँ एहिसँ सबसँ बेसी नोकसान भऽ रहल अछि, जखनि कि कांग्रेस पार्टी फायदा उठाबैत अछि। कांग्रेस पार्टी मुसलमानकेँ गरीब बनेबाक काज कयलक आब ओ सब मुसलमान पर राजनीति करैत अछि।”
