बिहार विधानसभा चुनावक उत्साह आब दिल्लीसँ पटना धरि शुरू भऽ गेल अछि। पटना पहुंचल केंद्रीय रक्षा मंत्री राजनाथ सिंह एकटा पैघ घोषणा करैत कहला जे बिहार नीतीश कुमारक नेतृत्वमे विकसित भऽ रहल अछि आ होयत। भाजपा राज्य कार्य समितिक बैसारकेँ संबोधित करैत केंद्रीय रक्षा मंत्री राजनाथ सिंह एकटा पैघ घोषणा कयलनि। ओ कहलनि जे भाजपा आ नीतीश कुमारक नेतृत्वमे बिहार विकासक राह पर अछि। हमर मुख्यमंत्री होथि वा उप सीएम, हुनकर प्रतिष्ठा पर कोनो दाग नहि अछि, ई बात कियो साबित नहि क’ सकैत अछि। एहि बेर चुनाव मात्र विकास पर होएत। एकर संग-संग ओ कहलनि जे नीतीश कुमार बिहारक अगिला सीएम हेताह आओर एनडीए दू तिहाई बहुमतसँ बिहारमे सरकार बनाओत।
राजनाथ सिंह लालू प्रसाद यादव पर तंज करैत कहलनि जे राजदक संग कांग्रेस सेहो बिहारकेँ बर्बाद करय केर दोषी रहल अछि, दुनू केर सरकार बिहारकेँ रसातलमे धकेलि देने छल, अपराध, जातिवाद आ जंगलराजक कारण बिहार अन्हारमे चलि गेल छल, धीरे-धीरे ई अन्हार समाप्त भऽ गेल अछि। भाजपा आ नीतीश कुमारक नेतृत्वमे बिहार विकासक राह पर अछि। बिहार जे कहियो बर्बाद भऽ गेल छल, आइ आत्मनिर्भर भऽ गेल अछि।
राजनाथ कहलनि, जे बिहारकेँ अन्हारमे धकेलय चाहैत छथि ओ सफल नहि होएत। कर्पूरी ठाकुरक विचारधारा भाजपा आ एनडीए मात्र आनि सकैत अछि। लालूजी जनताक नेताक लेल गाली गलौजक प्रयोग करैत छलाह, लालू जी कहियो कर्पूरीजीकेँ सम्मान नहिं कयलनि। असली सम्मान कर्पूरीजीकेँ केंद्र सरकार द्वारा मरणोपरांत भारत रत्नसँ सम्मानित कय देखाओल गेल| हम जे कहैत छी से करैत छी। लालूजी अपन जीप तक कर्पूरीजीकेँ नहि देलनि।
लालू यादव बाबा साहेब अम्बेडकरक तस्वीर पैर लग रखलनि, ई बहुत लाजक बात अछि। एहिसँ पता चलैत अछि जे राजदक विचारधारा आ सोच की अछि, एहि लोकक असली चेहरा समाजक सामने आबि चुकल अछि।
राजद-कांग्रेस मिल कय बिहारकेँ अपराध आ बेरोजगारी देलक आ महिलाकेँ असुरक्षित रखलक। लालूजीक शासन कालमे संविधानक बदला गोलीक आवाज सुनबामे अबैत छल, लोककेँ ई बात मोन पाड़य पड़त। सामंती मानसिकता वला लोक समाजवादक नाम पर बिहारक संग धोखा कयलक अछि। ई सब बात बिहारक लोककेँ बुझाबय पड़त।
