ओडिशाक पुरीमे गुंडिचा मंदिर लग भेल भगदड़क घटना पर माझी सरकार कारवाई करैत दु अधिकारीकेँ निलंबित क’ देलक अछि। डीसीपी बिष्णु पति आ कमांडेंट अजय पाढ़ीकेँ ड्यूटीमे लापरवाहीक कारण निलंबित क’ देल गेल अछि। ताहि संग-संग, पुरी केर जिला कलेक्टर आ पुलिस अधीक्षक (एसपी) केर बदली क’ देल गेल अछि। चंचल राणाकेँ नव जिला कलेक्टर नियुक्त कएल गेल अछि। ताहि संग, पिनाक मिश्राकेँ नया एसपी केर जिम्मेदारी देल गेल अछि।
एकर अतिरिक्त, ओडिशा सरकार मृतकक परिजनकेँ २५ लाख रुपया केर आर्थिक सहायता देबाक घोषणा क’ देलक अछि।
एकर जानकारी रविकेँ सीएम मोहन चरण माझी केर कार्यालय द्वारा देल गेल।
मुख्यमंत्री कार्यालय द्वारा सीएम मोहन माझीके् हवाला दैत कहल गेल, ”एहि घटनासँ अत्यंत दुखी आ व्यथित छी। मुख्यमंत्री व्यक्तिगत रूपसँ एहि घटना लेल राज्य सरकार तरफसँ खेद प्रकट कएलनि अछि। मुख्यमंत्री दिवंगत श्रद्धालुक परिवारक प्रति अपन संवेदना प्रकट कएलनि आ परिजनकेँ २५ लाख रुपयाक आर्थिक सहायता देबाक घोषणा कयलनि अछि।
एहिसँ पहिलने भगवान जगन्नाथक रथ यात्राक दौरान भेल भगदड़ पर मुख्यमंत्री मोहन चरण माझी दुख व्यक्त कएलनि। ओ भगदड़केँ लए कऽ माफी मांगलाह आ कहलाह कि भगदड़क कारण भेल दुर्भाग्यपूर्ण घटनाक लेल हमसभ जगन्नाथ भक्त लोकनिसँ दिलसँ माफी मांगैत छी।
जनतब जे पुरीमे रथ यात्राक दौरान श्री गुंडिचा मंदिर लग भेल दुखद भगदड़मे करीब तीन लोकक मृत्यु भेल अछि आ कतेको घायल भेल अछि। ई हादसा भोर लगभग ०४:३० बजे भेल। मृत्युकेँ प्राप्त तीनू गोटे खुरदा जिलासँ रथयात्रा लेल पुरी आयल छलथि।
