केंद्रीय गृहमंत्री अमित शाह भारतकेँ प्रतिष्ठित विश्व पुलिस आ फायर गेम्स 2029 केर आयोजन भेटला पर खुशी व्यक्त करैत सभ भारतीय लेल एकरा गौरवशाली क्षण बतौलनि। ओ कहलनि कि ई उपलब्धि प्रधानमंत्री नरेंद्र मोदीक नेतृत्वमे भारतमे विकसित कयल गेल विशाल खेल बुनियादी ढाँचा वैश्विक पहिचान अछि। संगहि, ओ अहमदाबादकेँ एही पैघ आयोजनक स्थलक रूपमे चयनित भेला पर खेल क्षेत्रमे शहरक बढ़ैत प्रतिष्ठाक प्रमाण बतेलनि।
गृहमंत्री अपन एक्स पोस्टमे लिखलनि, “सभ भारतीय लेल ई बहुत गर्वक बात अछि कि भारतक प्रतिष्ठित 2029 विश्व पुलिस आ फायर गेम्सक आयोजनक जिम्मा सौंपल गेल। ई हमर प्रधानमंत्री नरेंद्र मोदीजीक नेतृत्व बनल भव्य खेल बुनियादी ढाँचाकेँ वैश्विक मान्यता अछि। अहमदाबादकेँ एकर आयोजन स्थलक रूपमे चुनल जयबासँ ई अंतरराष्ट्रीय खेल नक्शा पर आबि गेल।”
जनतब जे विश्व पुलिस आ फायर गेम्स द्विवार्षिक (हर दू साल पर) आयोजित होइत अछि जे 1985 मे शुरू भेल छल। एखनि धरि एकर 20 संस्करण भेल अछि, जाहिमे सँ ई 8 बेर अमेरिकामे, 5 बेर कनाडामे, 4 बेर यूरोपमे, 2 बेर यूकेमे आ 1 बेर चीनमे आयोजित भेल अछि। ई खेलक आयोजन पुलिस, फायर, आपातकालीन चिकित्सा सेवा, आपदा सेवा आ अन्य फर्स्ट रिस्पांसर लेल कयल जाइत अछि।
भारतीय पुलिस टीम सबसँ पहिल 2006 मे एडिलेडमे आयोजित विश्व पुलिस आ फायर गेम्समे भाग लेने छल।तहियासँ भारत आब एहि खेलक 8 संस्करणमे भाग लेने अछि आ कुल 1400 सँ बेसी पदक जीत चुकल अछि। सबसँ ताजा २०म संस्करण कनाडाक विनिपेगमे 26 जुलाईसँ 6 अगस्त 2023 धरि आयोजित कयल गेल छल, जाहिमे भारतीय पुलिसक 133 खिलाड़ी भाग लेलनि आ 224 स्वर्ण, 82 रजत आ 37 कांस्य पदक सहित 343 पदक जीतलक। भारतीय दलक लेल ई एखन धरिक सबसँ नीक प्रदर्शन छल।
विश्व पुलिस आ फायर गेम्स लेल भारतीय टीमक चयन वार्षिक अखिल भारतीय पुलिस खेलक दौरान खिलाड़ीक प्रदर्शनक आधार पर कयल जाइत अछि। देशक पुलिस खेलक संचालन अखिल भारतीय पुलिस खेल नियंत्रण बोर्ड द्वारा कयल जाइत अछि, जाहिमे केंद्रीय सशस्त्र पुलिस बल (सीएपीएफ), राज्य पुलिस बल आ अन्य सुरक्षा एजेंसी सहित 53 सदस्य संगठन अछि। बोर्ड हर साल 40 राष्ट्रीय स्तरक पुलिस खेलक आयोजन करैत अछि आ ई सभ खेलसँ स्वर्ण पदक विजेता केर अंतरराष्ट्रीय टीम लेल चुनल जाइत अछि। भारतक 2029 संस्करणक मेजबानी नहि सिर्फ देशक खेल क्षमताक गवाह अछि, बल्कि एकरासँ पुलिस आ आपातकालीन सेवा कर्मी सभक समर्पण आ कौशलकेँ वैश्विक मंच पर प्रदर्शित करय केर स्वर्णिम अवसर सेहो भेटत।
