बिहार पुलिसकेँ शनिदिन करीब 22 हजार नव सिपाही भेटल। काल्हि मुख्यमंत्री नीतीश कुमार करीब 22 हजार सिपाहीकेँ नियुक्ति पत्र सौंपलनि। एहि अवसर पर सब सिपाही द्वारा शराबबंदी कानूनकेँ सख्तीसँ लागू करबाक शपथ लेल गेल। संगहि सीएम नीतीश कुमार कहलनि जे सरकार पुलिस बलक संख्या आओर बढ़ेबाक फैसला कयलक अछि।
ई कार्यक्रम राजधानी पटनाक बापू सभागारमे आयोजित भेल छल। एहि साल बिहारमे चुनाव होबय जा रहल अछि। चुनावक राजनीतिक हलचलक बीच नीतीश सरकारक नियुक्ति पत्र वितरण समारोह एकटा पैघ कार्यक्रम अछि। नीतीश कुमार स्वयं एहि कार्यक्रमक बारेमे अपन सोशल मीडिया हैंडल एक्स पर जानकारी देलनि।
नीतीश कुमार शुक्रदिन कार्यक्रमक बारेमे पोस्ट करैत कहलनि जे, काल्हि 28 जून 2025 राज्यक युवा आ बिहार पुलिसक लेल एकटा महत्वपूर्ण दिन अछि। काल्हि बापू सभागारमे 21,391 नवनियुक्त सिपाहीकेँ नियुक्ति पत्र बांटल जायत। ओ आगू कहलनि जे, राज्यमे कानूनक राज स्थापित अछि। कानून व्यवस्थाकेँ मजबूत राखब शुरूसँ हमर सबहक प्राथमिकता रहल अछि। कानून व्यवस्थाकेँ मजबूत करबा लेल बिहारमे पुलिसकर्मी आ पुलिस अधिकारीक नियुक्ति लगातार भऽ रहल अछि।
सीएम नीतीश कुमार आगू एहि पोस्टमे कहलनि, 24 नवंबर 2005 केँ नव सरकारक गठनक समय बिहार पुलिसमे काज करय वाला बलक संख्या 42,481 छल। वर्ष 2006 सँ कानून व्यवस्थामे आओर सुधार लेल पुलिस बलक संख्यामे लगातार बढ़ोतरी भऽ रहल अछि। सरकार पुलिस बलक संख्या बढ़ाबय केर फैसला कयलक अछि आओर एहि लेल 2 लाख 29 हजार सँ बेसि पद बनाओल गेल अछि आओर पुलिस कर्मीक तेजीसँ बहाली भऽ रहल अछि। स्वीकृतक अनुसार सभ पद एहि सालक अंत धरि भरल जायत। एहिसँ अपराध पर नियंत्रणमे मदद भेटत, ग्रामीण आ शहरी क्षेत्रमे पुलिसक मौजूदगी बढ़त आ आम नागरिक लेल बेहतर सुरक्षा व्यवस्था सुनिश्चित कयल जाएत।
