जम्मू कश्मीरक उधमपुर जिलामे भारतीय सेनाक जवान आ आतंकीक बीच मुठभेड़ भेल अछि। एहि इलाकामे भारी संख्यामे सैनिक तैनात अछि। ई मुठभेड़ बृहस्पतिदिन बसंतगढ़क बिहाली इलाकामे सेना आ पुलिसक संयुक्त अभियानक दौरान भेल अछि। भारतीय सेना एकर पुष्टि कयलक।
एहि ऑपरेशनक नाम “ऑपरेशन बिहाली” राखल गेल अछि। व्हाइट नाइट कोर सोशल मीडिया प्लेटफॉर्म एक्स पर जारी पोस्टमे कहलक जे, “खुफिया जानकारीक आधार पर भारतीय सेना आ जम्मू-कश्मीर बसंतगढ़क बिहाली इलाकामे संयुक्त अभियान शुरू कयलक। आतंकीक पहिचान भऽ गेल अछि। इ अभियान जारी अछि।”
अधिकारीक कहब छल जे जिलाक बसंतगढ़ इलाकामे संदिग्ध गतिविधिक खबर अछि। सेना भोरमे इलाकाकेँ घेराबंदी कय तलाशी अभियान शुरू कयलक। एम्हर सैनिक सभ पर गोलीबारी भेल, जकर जवाब देल गेल आ एहिसँ मुठभेड़ भेल। मौका पर अतिरिक्त बल भेजल गेल अछि।
उधमपुर जिलाक बिहाली इलाकामे ई मुठभेड़ अप्रैलमे पहलगाममे पर्यटक पर भेल भयावह आतंकी हमलाक करीब दू महीना बाद भेल, जाहिमे 26 लोकक मौत भऽ गेल छल।
एतबे नहि ई मुठभेड़ अमरनाथ यात्रा शुरू होबयसँ मात्र एक सप्ताह पहिने भेल अछि। अमरनाथ यात्रा 3 जुलाईसँ शुरू होबय जा रहल अछि। 9 अगस्तकेँ समाप्त होबएवाला यात्रा अवधिमे आगामी दिनमे अमरनाथ गुफा मंदिरमे भारी संख्यामे तीर्थयात्री सभक दौरा करबाक उम्मीद अछि।
अमरनाथ यात्राकेँ देखैत केंद्रीय क्षेत्रमे सुरक्षा बलकेँ पहिनेसँ अलर्ट कय देल गेल अछि। यात्रा मार्ग पर विभिन्न स्थान पर सैनिक तैनात कयल जायत। अमरनाथ यात्राक सुरक्षा सुनिश्चित करबा लेल जम्मू कश्मीरमे बीएसएफ, सीआरपीएफ आ एसएसबी केर अतिरिक्त कंपनी तैनात कयल गेल अछि।
