पटनाक बापू सभागारमे तेजस्वी यादवक ‘युवा संवाद कार्यक्रम’ समाप्त भेलाक बाद भीड़ बेकाबू भऽ गेल। एहि दौरान सभागारक काँच टूटि गेल। एहि संबंधमे भाजपा कहलक जे जाहि तरहे हंगामा भेल आ सरकारी संपत्तिक नुकसान पहुंचल, ओ जंगलराज-2 केर आहट अछि।
तेजस्वी यादव बिहारक राजधानी पटनाक बापू सभागारमे ‘युवा संवाद कार्यक्रम’केँ संबोधित कयलनि। कार्यक्रम समाप्त भेला पर भीड़ बेकाबू भऽ गेल। एहि दौरान सभागारक काँच टूटि गेल। एहि संबंधमे भाजपा राजदकेँ निशाना बनेलक अछि। पार्टी प्रवक्ता नीरज कुमार कहलनि जे बापू सभागारमे तेजस्वीक कार्यक्रमक दौरान जाहि तरहे हंगामा भेल, सरकारी संपत्तिक नुकसान पहुंचल, ई जंगलराज-2 केर आहट अछि। एहिसँ इ साबित होइत अछि जे जँ गलतीयोसँ सत्तामे आबि गेल तऽ सरकारी संपत्तिक कोना नुकसान पहुंचा़त, दुरुपयोग आ लूटत।
एहिसँ पहिने कार्यक्रममे युवा सभकेँ संबोधित करैत तेजस्वी यादव कहलनि जे अहाँ बीस साल नीतीश कुमारकेँ देलहुं, हमरा बीस मास दिअ। जे कुम्भकरनक नींदमे सुतल छल ओकर समय समाप्त भऽ गेल। समय आबि गेल अछि जे बिहार लेल सकारात्मक सपना रखैत छथि। बिहारक छात्र आ युवाक समय आबि गेल अछि।
तेजस्वी यादव कहलनि जे, नाराबाजी करयवला प्रधानमंत्री देशक सबसँ गरीब राज्य बिहारमे आबैत छथि, जतय हुनकर पार्टी, हुनकर गठबंधन सरकार 20 सालसँ सत्तामे अछि, मुदा गरीबक बारेमे एक शब्द नहि बाजैत छथि। बेरोजगारी पर मुँह तक नहि खोलैत छथि । बिहारक मुख्यमंत्रीक गप नहि करब तऽ नीक रहत। मानसिक संतुलन आ मानसिक स्वास्थ्य खत्म भऽ गेल अछि।
बिहारमे नफरत आ कट्टरताक राजनीति नहिं चलत। बिहारक युवा आब नीति बनाओत आ नेतृत्व सेहो देत। ई बिहार अछि। ई भगवान बुद्ध, महावीर आ गुरु गोविन्द सिंह जीक भूमि अछि। घृणा आ कट्टरताक राजनीति एतय काज नहि करत। एतय युवा आ छात्रक नेतृत्वमे विकास, उत्थान आ प्रेमक उज्ज्वल सरकार चलत।
राज्य सरकार पर हमला करैत तेजस्वी यादव कहलनि जे भाजपा-नीतीश सरकारक रोजाना गारि-गरौबलि, ताना-बाना, आरोप, जवाबी आरोप, बहाना, कमीशन, भ्रष्टाचार आ नौकरशाहीसँ बिहारकेँ कोनो फायदा नहि होएत। बिहार केवल तेजस्वी सरकारसँ समृद्ध होयत जे शिक्षा, दवाई, आय, सिंचाई, सुनवाई आ कार्यवाहीक व्यवस्था करत।
