ईरान-इजरायल द्वारा युद्धविरामक उल्लंघनक किछु देर बाद अमेरिकी राष्ट्रपति डोनाल्ड ट्रंप फेरसँ जनतब साझा कयलनि। ट्रूथ सोशल पर एकटा पोस्टमे ट्रंप लिखलनि, इजरायल ईरान पर हमला नहि करत। सब विमान वापस घर घुमि कय ईरानकेँ दोस्ताना ‘प्लेन वेव’ देत। ककरो कोनो नुकसान नहि होयत, युद्धविराम लागू अछि! एकर संग किछु देर बाद ट्रंप एकटा आओर पोस्टमे लिखलनि, ईरान अपन परमाणु सुविधा केर पुनर्निर्माण कहियो नहि करत।
एहिसँ पहिने डोनाल्ड ट्रंप कहने छलाह जे ईरान आ इजरायल दुनू युद्धविरामक नियमक उल्लंघन कयलक अछि। ई युद्धविराम काल्हि मंगलक भोरसँ लागू होबय वला छल, मुदा एकर किछु देर बाद दुनू देशसँ हमला भऽ गेल। ट्रंप इजरायलकेँ चेतावनी देलनि जे तुरंत अपन पायलटकेँ बमबारी बंद करय लेल आदेश देल जाय। ओ सोशल मीडिया प्लेटफॉर्म ट्रूथ सोशल पर इजरायल पर लिखने छथि, बम नहि छोड़ू। अगर अहाँ एहेन करब तँ इ एकटा पैघ उल्लंघन होएत। तुरंत अपन पायलटकेँ वापस फोन करू।
मंगलक भोर इजरायल ईरान पर आरोप लगैलक कि युद्धविराम लागू होयबाक बाद ईरान हमर हवाई क्षेत्रमे मिसाइल फायर कयलक। ईरान केर सेना एहि बातसँ इनकार कयलक, मुदा उत्तरी इजरायलमे विस्फोट आ सायरनक आवाज सुनल गेल। इजरायली सेनाक कहब अछि जे ओ रास्तामे दू टा ईरानी मिसाइलकेँ नष्ट कय देलक।
जनतब जे ई संघर्ष १२ दिन पहिने तखनि शुरू भेल छल जखनि इजरायल ईरानक परमाणु आ सैन्य अड्डा पर हमला कयलक। इजरायलक दावा अछि कि ईरान परमाणु हथियार बनाबय केर कोशिश कय रहल अछि, जखनिकि ईरानक कहब अछि कि ओकर परमाणु कार्यक्रम शांतिपूर्ण अछि। एम्हर अमेरिका सेहो एहि हमलामे भाग लेलक आ ईरानक परमाणु अड्डा पर बंकर-बस्टर बम गिरौलक।
सोमदिन ईरान जवाबी कार्यवाहीमे कतर स्थित अमेरिकी सैन्य अड्डा पर हमला कयलक। एकर बाद ट्रंप युद्धविरामक घोषणा कयलनि, जकरा दुनू स्वीकार कय लेलक। मुदा ताजा हमलाक बाद एहि युद्धविराम पर सवाल उठल अछि। एकर संग इजरायलक वित्त मंत्री बेत्सालेल स्मोट्रिच एक्स पर लिखलनि कि ‘तेहरान काँपतै’, जाहिसँ ई साफ भऽ गेलै कि ई संघर्ष प्रायः एखनि खतम नहि भऽ रहल अछि।
