अंतर्राष्ट्रीय योग दिवसक अवसर पर शनिदिन सीएम साइंस कॉलेजमे योगाभ्यास कार्यक्रमक आयोजन कयल गेल। महाविद्यालयक एनसीसी आ एनएसएस इकाई केर संयुक्त तत्वावधानमे आयोजित कार्यक्रमक शुभारंभ प्रधानाचार्य प्रो दिलीप कुमार चौधरी कयलनि। मौका पर ओ कहलनि जे स्वस्थ तन आ मन लेल योग बहुत उपयोगी अछि। योग धर्म नहि विज्ञान अछि। ई तन, मन आ आत्माकें परमात्मासँ जोड़बाक विधान अछि। ओ कार्यक्रममे उपस्थित सभ लोकनिकें अंतर्राष्ट्रीय योग दिवसक बधाइ आ शुभकामना देलनि।
बर्सर डा उमेश कुमार दास योगसँ होबय बला लाभ केर बारेमे विस्तारसँ जानकारी देलनि। कार्यक्रमक संयोजक सह एनएसएस केर कार्यक्रम पदाधिकारी डा सत्येन्द्र कुमार झा स्वस्थ रहबा लेल योगकें अपन दैनिक जीवनमे शामिल करबाक संकल्प दियेलनि।
कार्यक्रममे अतिथि योग प्रशिक्षिका तन आ मन केर बीच सामंजस्य स्थापित करैत योगसँ स्वस्थ्य जीवन लेल विभिन्न कला आ आसनक योगाभ्यास करोलनि। कार्यक्रममे शामिल शिक्षक, शिक्षकेत्तर कर्मचारी आ छात्र-छात्रा द्वारा योगाभ्यास, प्राणायाम आ ध्यान केर प्रदर्शन कयल गेल।
मौका पर डा रोहित कुमार झा, प्रवीण कुमार झा, पवन कुमार ठाकुर, चेतकर झा, सतीश कुमार, राजेश कुमार सिंह, रतन मिश्रा, जितेंद्र राम आदि सहित एनसीसी कैडेट आ एनएसएस स्वयंसेवक केर उल्लेखनीय उपस्थिति छलनि।
