कोर्टसँ चर्चित वकील अम्बर इमाम हाशमी आ सुशील चौधरी गिरफ्तार, अधिवक्ता सभक विरोध प्रदर्शन

दरभंगा समदिया
*

दरभंगा व्यवहार न्यायालयमे शुक्रदिन हड़कंप मचि गेल जखनि कोर्ट एकटा नामी क्रिमिनल वकील अम्बर इमाम हाशमीकेँ अदालतसँ गिरफ्तार कs जेल भेजबाक आदेश देलक। ई मामिला 32 साल पुरान हत्यासँ जुड़ल अछि, जाहिमे हाशमी आ हुनकर दूनू भाई पर गंभीर आरोप लागल अछि।

दरअसल, कोर्टमे पेश नहि हेबा लेल वकील अंबर इमाम हाशमी फॉर्म 117 भरि कs कहलथि जे ओ जिलासँ बाहर छथि। मुदा किछु समय बाद ओही एडीजे तृतीय (सुमन कुमार दिवाकर) केर कोर्टमे दोसर मामिलाक बहस करय लेल पहुँचलाह, जज साहेब हुनका देखलखिन तs पुछलखिन जे अहाँ छुट्टी पर छी, तखनि अहाँ एतय कोना आबि गेल छी ? एकर बाद कोर्ट तुरंत न्यायिक हिरासतमे लs कs गिरफ्तार करबाक आदेश देलक।

अंबर इमाम हाशमीक गिरफ्तारीसँ दरभंगा कोर्टमे वकीलमे जबरदस्त आक्रोश देखल गेल। अधिवक्ता सभ जोरदार विरोध करैत कहलनि जे जा धरि हाशमीकेँ बिना शर्त रिहा नहिं कयल जायत ता धरि ओ सभ न्यायिक काजसँ परहेज करताह।
वकील सभ कहलनि जे, दरभंगा कोर्टक इतिहासमे आई एकटा ‘काला दिन’ केर रूपमे देखल जायत।

ई मामिला साल 1994 केर अछि, जखनि हनुमाननगर थाना क्षेत्रक पटोरी बसंत गाममे दर्जनों राउंड फायरिंग भेल छल, एहि घटनामे रामकृपाल चौधरीक मौका पर मृत्यु भेल छल आ छह गोटे घायल भेल छल। एकर बाद विशनपुर थानामे केस नंबर 58/1994 दर्ज भेल।

अम्बर इमाम हाशमीक संग हुनकर सहयोगी वकील सुशील कुमार चौधरीकेँ सेहो गिरफ्तार कयल गेल अछि। सुशील चौधरी कहलनि जे, ओही मामिलामे हुनका सेहो न्यायिक हिरासतमे लs जेल पठाओल गेल अछि। वरिष्ठ अधिवक्ता राजीव रंजन ठाकुर एहि कारवाईकेँ गलत बतबैत कहला जे एहेन मामिलामे कोनो वकीलकेँ जमानत देबाक अधिकार अछि। कोर्ट हुनका बिना कोनो कारणकेँ जेल भेज कs मनमाना कयलक अछि।