वैशाली जिलामे एकटा परिवारक तीन लोकक इनारमे डूबलाक बाद मृत्यु भs गेल। एक दोसराकेँ बचाबय केर कोशिशमे तीनूक मृत्यु भs गेल।
घटना देसरी प्रखंडक चांदपुरा थाना क्षेत्रक जहांगीरपुर धाम पंचायतक वाभनगामा गाममे भेल। घटनाक बाद इलाकामे हाहाकार मचि गेल। चारू कात लोकक भीड़ जमा भs गेल। सूचना भेटला पर पुलिस मौका पर पहुंचल आ जांच शुरू कs देलक।
मृतकक पहिचान 60 वर्षीय बिंदेश्वर राय, हुनकर 30 वर्षीय भतीजा विकास आ 25 वर्षीय युवकक रूपमे कयल गेल अछि। जानकारीक अनुसार परिवारक लोक इनार लग काज कs रहल छल कि अचानक एकटा सदस्य खसि पड़ल। बाकी दू गोटे हुनका बचाबय केर कोशिशमे इनारमे कूदि गेल, मुदा दुर्भाग्यवश ओहो सभ डूबि गेलाह, स्थानीय लोक तत्काल पुलिस आ बचाव दलकेँ घटनाक जानकारी देलक। मुदा, जाबे लोक मौका पर पहुंचल ताबे तीनू गोटेक मृत्यु भs गेल छल। घटनाक बाद परिवारक लोककेँ कानि-कानि कs खराब हाल अछि।
