काल्हि 20 जूनकेँ सिवानक जसोलीमे होबय बला प्रधानमंत्री नरेंद्र मोदीक जनसभाक तैयारी जोरसँ चलि रहल अछि। एहि क्रममे बिहारक उपमुख्यमंत्री विजय कुमार सिन्हा बुधदिन गोपालगंज जिलाक थावे प्रखंडमे जनसंपर्क अभियान चलौलनि। थावे प्रखंडक बहुत रास अन्य पंचायतमे आम नागरिकसँ बातचीत कय राजग सरकारक उपलब्धिक बारेमे लोगकेँ जनतब देलनि। पत्रकार सबसँ बातचीतक दौरान ओ राष्ट्रीय जनता दलक सुप्रीमो लालू प्रसाद यादव आओर हुनक बेटा तेजस्वी यादव पर हमला कयलनि।
उपमुख्यमंत्री कहलनि जे तेजस्वी यादवकेँ पहिने अपन पिता लालू प्रसाद यादवक मानसिक स्थिति पर सवाल उठाबय केर चाही, जे बिहारकेँ बर्बाद कय ‘बिहारी’ शब्दकेँ गारि बना देलनि। आइ ओ व्यक्ति राष्ट्रीय जनता दलक अध्यक्ष छथि। एहेन व्यक्ति जकरा माननीय न्यायालय द्वारा भ्रष्टाचारक ठप्पा लगा देल गेल अछि ओ एखनो पार्टीक नेतृत्व कय रहल छथि। की तेजस्वी यादव अपन पिताकेँ अध्यक्ष पदसँ हटाबय केर हिम्मत देखेताह ?
ओ आगू कहलनि, भ्रष्टाचारक आरोपी पार्टीक राष्ट्रीय अध्यक्ष बनाबयसँ ई पता चलैत अछि जे भ्रष्टाचार राजदक लेल आदर्श बनि गेल अछि। लालू यादवक समयमे सरकारी मशीनरी पर पूर्ण रूपसँ परिवारक नियंत्रण रहबाक आरोप लगाबैत विजय सिन्हा कहलनि, जे सरकारी नौकरीसँ ल कय योजना धरि सभमे सब पर केवल एकटा परिवारक बोलबाला छल। सोनाक चम्मच लऽ कय जन्म लेनिहार, चार्टर्ड विमानमे जन्मदिन मनाबय वला लोक आब जनताकेँ उपदेश दऽ रहल छथि। खजाना लूटनिहार आब नैतिकताक गुहार लगा रहल छथि। एहेन लोक बिहारकेँ फेर बर्बाद करय लेल नहि चाही।
एनडीए सरकारक गरीब, किसान आ युवाक सरकार बताबैत उपमुख्यमंत्री कहलनि जे प्रधानमंत्री नरेंद्र मोदीक नेतृत्वमे बिहार विकास पथ पर अग्रसर अछि।
